07 октября 2017 г.
Иртнĕ кунсенче ĕçлĕ визитпа Чăваш Республикин Тĕп федераллă инспекторĕ Г.Федоров пирĕн районта пулнă, граждансене хумхантаракан ыйтусемпе йышăну ирттернĕ.
Унта çавăн пекех çутçанталăка сыхлассипе ĕçлекен Федераллă службăн Чăваш Республикинчи Управленийĕн пуçлăхĕн заместителĕ В.Косачев, Федераллă антимонопольнăй службăн Чăваш Республикинчи Управленийĕн пуçлăхĕн заместителĕ В.Котеев, Россельхознадзорăн Чăваш Республикинчи тата Ульяновск облаçĕнчи Управленийĕн пуçлăхĕн заместителĕ А.Андреев, Чăваш Республикинчи экологи тата çутçанталăк ресурсĕсен министрĕн заместителĕ А.Ефремов, Чăваш Республикинчи транспорт тата çул-йĕр хуçалăхĕн министрĕн заместителĕ Е.Павлов, Чăваш Республикинчи строительство, архитектура тата пурăнмалли çурт-йĕрпе коммуналлă хуçалăх министрĕн заместителĕ В.Максимов, Вăрмар район прокурорĕ Е.Краснов, Вăрмар район пуçлăхĕ М.Пуклаков, Вăрмар район администрацийĕн пуçлăхĕ А.Васильев хутшăннă.
Ĕçлĕ ушкăн пĕтĕмĕшле 8 ыйту пăхса тухнă. Тĕп федераллă инспектор патне Саруй, Кавал, Тикаш, Тупах, Арапуç ялĕсенче тата Вăрмар поселокĕнче пурăнакан граждансем хăйсене хумхантаракан ыйтусемпе тухнă. Сăмахран, Тикаш ялĕнче пурăнакансем "Вăрмар - Тикаш - Аслă Кайпĕç" автоçула юсамалли çинчен каларĕç. Унăн тăршшĕ 14,88 километр, вĕсенчен 8 километр тăршшĕ капиталлă юсав ĕçĕсем пурнăçламалла. Ку ыйту çине хурав çапларах пулчĕ: кăçал 1 километр тăршшĕ автоçула юсанă. Унсăр пуçне тата 15 миллион тенкĕ уйăрнă. Асăннă укçа-тенкĕпе тата 3 километр тăршшĕ çул-йĕре юсама палăртнă. Çак ĕçе пурнăçлама 2017 çулхи октябрĕн 12-мĕшĕнче аукцион иртмелле. Ун хыççăн подрядчик асăннă çул-йĕре юсама тытăнĕ.
Саруй ялĕнче пурăнакан староста асăннă ялти урамсенче каçхи вăхăтра çутă çителĕксĕрри пирки каларĕ. Ку ыйтăва район шайĕнче пăхса тухма палăртрĕç.
Кавал ял тăрăхĕнчи карьертан вырăнти халăх хăйăр тата вак чул турттарма юрани е юраманни пирки те ыйтса пĕлчĕ. Ку ыйту çине тĕплĕнрех хурав çитес вăхăтра парасси пирки пĕлтерчĕç.
Тупах ялĕнчи Октябрьская урамра пурăнакан пĕр гражданин çак урама çутçанталăк газĕ кĕртес ыйтупа килнĕ. Ку енĕпе кирлĕ документсем хатĕрлесе çитерсен çак ĕçе пурнăçлама пулни, çитес вăхăтра районăн яваплă çыннисем асăннă урамри граждансемпе тĕл пулса çак ыйтăва тепĕр хут пĕрле сÿтсе явасси пирки те каларĕç.
Арапуç ялĕнче пурăнакансене вара электричество проводисене çыхăнтаракан юпасем юрăхсăра тухни пăшăрхантарчĕ. Ку ыйтупа та тивĕçлĕ решени пуласса пĕлтерчĕç яваплă çынсем.
Ĕçлĕ тĕлпулура çавăн пекех "Урмарская" кайăк-кĕшĕк фабрики" акционерсен уçă обществи кайăк-кĕшĕк грипĕнчен сыхланса мĕнлерех ĕçсем туса ирттерни, Арапуç ялĕ патĕнчи карьерта çÿп-çап, ăпăр-тапăр пуçтарăнни, Çĕнĕ Кинчер ялĕ айккинче те çакăн пек лару-тăру пулни çинчен сÿтсе яврĕç.
Пĕтĕмĕшле каласан тĕлпулăва килнĕ граждансен ыйтăвĕсем çине çÿлерех асăннă яваплă çынсем хуравсем пачĕç. Унсăр пуçне ĕçлĕ тĕлпулура хускатнă хăш-пĕр ыйтусене ятарлă организацисене тивĕçлĕ решенисем йышăнма ярса парĕç. Кашни ыйтăва мĕнле пурнăçланине Тĕп федераллă инспектор хăй контрольлесе тăрасса пĕлтерчĕ.
Источник: "Урмарская районная газета"
Первоисточник: З.ПАВЛОВА.