04 октября 2017 г.
Кашни çулах октябрĕн 5-мĕшĕнче Раççейре Вĕрентекен кунне паллă тăваççĕ. Çак кун шкул ачисем хăйсен юратнă вĕрентекенĕсене илемлĕ чечек çыххисемпе савăнтараççĕ, уяв ячĕпе саламлаççĕ. Нумай çул каялла шкултан вĕренсе тухнисем те хăйсене пурнăçăн анлă çулĕ çине кăларнă учительсене манмаççĕ, ырăпа аса илсе саламлаççĕ.
Педагог профессийĕ чи пĕлтерĕшлĕ профессисенчен пĕри. Шупашкарти И.Я.Яковлев ячĕллĕ Чăваш патшалăх педагогика университетĕнчен те кашни çулах нумай çамрăк вĕренсе тухать пулин те вĕсенчен нумайăшĕ чăн-чăн педагог пулаймасть. Шкул ачисене вĕрентес ĕçре учителĕн пĕлÿ шайĕ кăна мар, ачасене хăв пĕлнине тĕрĕс ăнлантарма, предмета ача патне тĕрĕс илсе çитерме пĕлни кирлĕ.
Паян сăмахăм Вăрмарти Г.Е.Егоров ячĕллĕ вăтам шкулта акăлчан чĕлхине вĕрентекен Елена Владимировна Егорова вĕрентекен пирки /ÿкерчĕк çинче/. Вăрмарти вăтам шкултан кĕмĕл медальпе вĕренсе тухнă Елена аслă пĕлÿ илме И.Я.Яковлев ячĕллĕ Чăваш патшалăх педагогика университетне çул тытать. Ют чĕлхесен факультечĕн студенчĕ пулса тăрать. Аслă вĕрентÿ заведенийĕнчен вĕренсе тухнă хыççăнах çамрăк Шупашарти 9 номерлĕ шкулта акăлчан чĕлхине вĕрентме пуçлать. Хулари шкулта çулталăк ĕçленĕ хыççăн 2011 çулта Еленăна шăпа Энĕшпуçĕнчи вăтам шкула илсе çитерет. Кунта шăпах акăлчан чĕлхине вĕрентекен кирлĕ пулнă. Халĕ виççĕмĕш çул ĕнтĕ Елена Владимировна хăй вĕреннĕ тăван шкулĕнче - Вăрмарти Г.Е.Егоров ячĕллĕ вăтам шкулта акăлчан чĕлхине вĕрентет. Çамрăк учителе шкул ачисем юратаççĕ. Елена Владимировнăна вĕрентнĕ чылай учитель паянхи кун та шкулта ĕçлет. Хăй вĕреннĕ шкула вĕренекен вырăнĕнче мар, вĕрентекен пулса килни пушшех те хумхантарнă çамрăк учителе. Хăй вăхăтĕнче ăна пĕлÿ панă учительсем халĕ унăн ĕçтешĕсем. Елена Владимировна хăйне тĕрĕс çул кăтартса пыракан вĕрентекенсене уйрăмах тав тăвать. "Вăрмарти шкулта ĕçлекен учительсем ачасене чăннипех те паха пĕлÿ параççĕ. Çак шкултан вĕренсе тухакансем хăйсен пĕлĕвĕсемпе хулари ачасенчен те ирттереççĕ. Шкулта пухнă пĕлÿ шайне кура эпĕ те аслă вĕрентÿ заведенийĕнче тÿлевсĕр майпа вĕрентĕм. Вăрмарти шкулта вĕреннĕшĕн эпĕ мухтанатăп", - пĕлтерет шухăшне Е.Егорова.
Елена Владимировна кăçал "Çулталăк вĕрентекенĕ - 2017" професси ăсталăхĕн конкурсне хутшăнса район шайĕнчи çĕнтерÿçи те пулнă.
"Шкулта вĕрентнĕ май предмета лайăх пĕлни кăна мар, ачасене унпа кăсăклантарма пĕлни кирлĕ. Ачасене вĕрентÿ процесне явăçтарма пĕлмелле", - каласа парать 7 класс ачисен класс руководителĕ Е.Егорова.
Шăпах 7 класс ачисемпе пĕрле вăл акăлчан чĕлхине тĕплĕнрех вĕрентес енĕпе кружок та ертсе пырать.
Источник: "Урмарская районная газета"
Первоисточник: Э.Михайлова.