20 сентября 2017 г.
Çак ятпа Анатолий Ильич Хованскийăн кăçал брошюра пичетленсе тухрĕ. Ăна вăл Вăрмар районĕ 90 çул тултарнине халалласа кăларчĕ. Анатолий Ильич 40 çул ытла хаçат редакцийĕнче ĕçленĕ май, спорт теми уншăн чи çывăххи тесен те йăнăш пулмасть. Вăл 8 кĕнеке авторĕ, вĕсенчен улттăшĕ спорт тематикипе çыхăннă.
Иртнĕ кунсенче районти краеведени музейĕнче «Вăрмар районĕн спорт çăлтăрĕсем» брошюрăн презентацийĕ иртрĕ. Унта районăн паллă çыннисем: писательсемпе поэтсем, ÿнер ăстисем, хăй вăхăтĕнче яваплă должноçсенче вăй хунисем, районти культура, библиотека ĕçченĕсем хутшăнчĕç. Эпир, районти тĕп библиотека ĕçченĕсем, А.Хованскийăн çырас ăсталăхне тишкерсе ятарласа вăл çырнă кĕнекесен презентацине йĕркелерĕмĕр. Асăннă брошюра «Олимп çулĕ такăр мар» спорт энциклопедийĕн справочникĕн кĕскетсе çырнă кăларăмĕ. Çак брошюрăна пирĕн районтан тухнă СССР тата Раççей тава тивĕçлĕ спорт мастерĕсен, Европа тата тĕнче чемпионачĕсен призерĕсемпе çĕнтерÿçисен ячĕсене кĕртнĕ. Пĕтĕмĕшле илсен спортăн 21 тĕсĕпе 133 спортсмен ятне палăртнă.
Çак мероприятие районти краеведени музейĕн директорĕ И.Дмитриева ертсе пычĕ. Район, республика шайĕнче яваплă должноçсенче ĕçленĕ В.Петров «Вăрмар районĕн спорт çăлтăрĕсем» брошюрăна пысăк хак пачĕ, вăл пуян содержаниллĕ пулнине палăртрĕ. «Хĕрлĕ ялав» хаçатра А.Хованскипе пĕрле ĕçленĕ А.Белова пай редакторĕ, журналист Вăрмар районĕ тĕнче шайĕнчи паллă спортсменсемпе пуян пулни, вĕсен çитĕнĕвĕсем çинчен çырса кĕнекесем пичетлесе кăларса Анатолий Ильич халăх умне çитерсе пысăк ĕç тунине каларĕ. Çавăн пекех асăннă мероприятие килнĕ ытти çынсем те тухса калаçрĕç, кĕнеке авторне саламларĕç, малашне те творчествăра ÿсĕмсем сунчĕç.
Кĕнеке презентацине килнисем районти тĕп библиотекăн краеведени уйрăмĕ «Тăван çĕр вăй-хăват парать» ятпа хатĕрленĕ кĕнекесен куравĕпе паллашрĕç.
Р.ИВАНОВА,
библиотекарь.