13 сентября 2017 г.
Сентябрĕн 9-мĕшĕнче ЧР Пуçлăхĕ М.Игнатьев «Советская Чувашия»
хаçат парнисене çĕнсе илессишĕн çăмăл атлетикăпа спорт ăмăртăвĕсене хутшăннисене саламланă.
Шупашкарти «Энергия» стадионра иртнĕ. Ăмăртăва Совет Союзĕн 2 хут Геройне, СССР космонавт-летчикне Андриян Николаева халалласа йĕр-келенĕ.
Спорт уявне уç-нă май республика Пуçлăхĕ М.Игнатьев пурне те çитĕнÿсем патне ăнтăлма, куракансене хаваслă кăмăл-туйăм суннă.
Чăваш Ен Пуçлăхĕ М.Игнатьев хăйĕн сăмахĕнче çăмăл атлетика енĕпе эстафета регионта чи анлă сарăлнă спорт ăмăртăвĕсенчен пĕри пулнине каланă. «Наци кросĕ», «Раççей йĕлтĕр йĕрĕ» спорт ăмăртăвĕсенчен пĕрре те кая мар тесе палăртнă. М.Игнатьев «Советская Чувашия» хаçатăн тĕп редакторне В.Васильева тата унта тăрăшакансене çулсерен çак ăмăртусене çÿллĕ шайра йĕркелесе ирттернĕшĕн ырласа тав сăмахĕсем каланă. «Çакăн пек мероприятисем халăха ытларах та ытларах спорта явăçтарма витĕм кÿреççĕ», - тенĕ М.Игнатьев. Сăмах май, ăмăртусем СССР космонавт- летчикне, Совет Союзĕн 2 хут Геройĕ ята çĕнсе илнĕ, Чăваш Республикин тата Шупашкар хулин Хисеплĕ гражданинĕ ята тивĕçнĕ А.Г.Николаева халалласа иртнине тепĕр хут палăртса хăварнă. Палăртмалла, вăл спорта питĕ хытă юратнă. «Андриян Николаев яланах герой ятне илме ĕмĕтленнĕ. Унăн ĕмĕчĕ пурнăçланнă. Вăл чăн-чăн патриот. Сахал мар тăрăшнă, спортра хăйĕн ăсталăхне туптанă, тÿсĕмлĕ, хастар та ĕçчен çын пулнă», - тенĕ М.Игнатьев.
Кăçал регионшăн спорт енĕпе питĕ тухăçлă çул пулнине каланă. Чăваш Енĕн 174 спортсменне Раççейĕн пĕрлештернĕ командине кĕртнĕ. Регионта кăçал пĕтĕм Раççей шайĕнче 59 спорт ăмăртăвĕ иртет. Декабрь уйăхĕн пуçламăшĕнче Раççей Кубокне тата ЧР Пуçлăхĕн парнисене çĕнсе илессишĕн ирĕклĕ мелпе кĕрешессипе хĕрарăмсем хушшинче спорт ăмăртăвĕсем пулĕç.
Спорт тытăмĕнче нумай çул ĕçлесе хисепе тивĕçнисене наградăсем панă. Вĕсем: Н.Кузьмина, А.Соловьев.
Эстафетăна пухăннисене çакăн пекех ЧР Патшалăх Канашĕн Председателĕ В.Филимонов, ЧР Патшалăх Канашĕн депутачĕ Е.Николаева, «Советская Чувашия» хаçатăн тĕп редакторĕ В.Васильев саламланă.
Ăмăртăва VIP-чупуран пуçланă. Влаç органĕсенче вăй хуракансем, министерствăсемпе ведомствăсен ертÿçисем, районсемпе хула пуçлăхĕсем, депутатсем 400 метрлă дистанцие чупса тухнă. Кăçалхипе 79-мĕш хут иртекен сумлă ăмăртура 154 ушкăн хутшăннă.
ЧР патшалăх влаç органĕсем хушшинче малти вырăна Спорт министерствин ушкăнĕ тухнă, хисеплĕ иккĕмĕш вырăна Чăваш Республикин Пуçлăхĕн Администрацийĕн команди тивĕçнĕ, виççĕмĕшне - Чăваш Республикин Финанс министерствин.
ЧР ПА пресс-служби.