30 августа 2017 г.
Хальхи саманара почтальон вырăнне Интернет йышăннă тесе кам калать? Апла мар çав - почтальонăн пысăк сумккийĕ яланхи пекех хут корреспонденципе лăк тулли. Нумайăшĕ почтальон ĕçĕ çăмăл - почта ещĕкне çыру кăна ямалла - тесе шухăшлать. Тĕрĕслĕхĕ вара урăхларах. Почтальонăн ÿт-пĕвĕпе вăйлă та чăтăмлă пулмалла, унăн хăш-чухне кунне вуншар километр çеç мар утса тухма тивет-çке. Унсăр пуçне ĕçпе çыхăннă тĕрлĕ инструкцисемпе правилăсене асра тытмалла, хăйне шанса панă участока лайăх пĕлмелле, çынсемпе калаçмалла, хутшăнмалла.
Пысăк Енккассинчи почта çыхăнăвĕн уйрăмĕнче ĕçлекенсемпе паллашар-ха. Кунта пурĕ çичĕ ĕçчен вăй хурать. Л.Петрова 2014 çултанпа почта çыхăнăвĕн уйрăмĕн начальникĕ пулса тăрăшать. Унăн ĕçĕ питĕ яваплă, кашни кун тĕрлĕ хутсемпе тата документсемпе ĕçлемелле. Людмила Даниловнăн вĕсенче йăнăшсем ан кайччăр тесе тĕрĕслемелле. Пĕр сас палли, пĕр цифра кăна йăнăш кайтăр - посылка, çыру е куçарнă укçа хуçи патне çитмесен те пултараççĕ. Çавăнпа питĕ тимлĕ пулмалла.
Кунта ĕçлекен почтальонсем - С.Яковлева, А.Николаева, Н.Васильева, Н.Прокопьева, Т.Сергеева, А.Ананьев /çапла-çапла, вĕсем хушшинче арçын та пур/ - хăйсен ĕçне, вăл йывăр пулсан та, кăмăллаççĕ. Вĕсен корреспонденцие Пысăк Енккасси ялĕнче пурăнакансем патне кăна мар, Урнар, Саруй, Карăкçырма, Уйкас, Энтрияль, Шăплат, Шутнерпуç ялĕсене те илсе çитермелле. Почтальонсем хаçат-журнала хăш яла, хăш урама, хăш киле çитермеллине палăртаççĕ, çырусемпе извещенисене те çапла майпах уйăраççĕ. Вĕсем бандерольсем, куçарнă укçасем, пенси укçисем илсе çитереççĕ. Çырăнтару ăнăçлăхĕ те почтальонсенчен килет. Ку çав тери яваплă ĕç пулнине никам та хирĕçлеймĕ. Унсăр пуçне килтен тухса çÿреймен çынсем саккас парса почтальонсенчен тавар та туянма пултараççĕ.
Пысăк Енккассинчи почта çыхăнăвĕн уйрăмĕнче ĕçлекенсене тăрăхри ялсенче пурте пĕлеççĕ, вĕсене ырă кăмăлĕшĕн, тăрăшулăхĕшĕн хисеплеççĕ. Акă, 3 класлă почтальон С.Яковлева 18 çул ĕнтĕ çанталăк пăтăрмахĕсене пăхмасăр йывăр сумкка çакса хаçат-журнал валеçме тухса çÿрет. Лайăх ĕçленĕшĕн вăл пĕрре çеç мар Тав çырăвĕсем тата Мухтав грамотисем илме тивĕçнĕ. Светлана Никитичнăна, тĕслĕхрен, пĕлтĕрхи декабрьте Раççей Почтин Хисеп грамотине парса чысланă. Кунта вăй хуракан ытти почтальонсем те ĕçченлĕхпе тата яваплăхпа палăрса тăраççĕ. Вĕсем пурте хисепе тивĕçлĕ. Йывăр-и, çăмăл-и, анчах почтальонсем парăнма хăнăхман. Вĕсем çирĕп тĕллевпе малалла утаççĕ, хăйсене кашни килтех кĕтнине пĕлеççĕ. Эппин, ăнăçу сунар вĕсене.
Источник: "Урмарская районная газета"
Первоисточник: И.ДАНИЛОВА.