26 августа 2017 г.
Августăн 23-мĕшĕнче Мускавра Чăваш Республикинчи промышленноç предприятийĕсен ĕçĕсем пирки презентаци иртнĕ, организацисем çĕнĕлле ĕçлесе пыни пирки каласа кăтартнă. Пысăк ĕçе "Росатом" Патшалăх корпорацийĕнче "АБС Электро" компанийĕн офисĕнче йĕркеленĕ.
Презентаци ĕçне ЧР Пуçлăхĕ М.Игнатьев, "Росатом" Патшалăх корпорацийĕн "Развитие продукции гражданского назначения" проектсен офисĕн ертÿçи Д.Байдаров, ЧР Министрсен Кабинечĕн Председателĕн çумĕ - экономика министрĕ В.Аврелькин, Чăваш Енри предприятисемпе организацисен ертÿçисем хутшăннă.
М.Игнатьев "Росатом" Патшалăх корпорацийĕн ĕçченĕсене, "АБС Электро" Патшалăх корпорацийĕнче тăрăшакансене региона пысăк тимлĕх уйăрнăшăн тав тунă.
Палăртса хăваратпăр, паянхи куна Чăваш Республики Раççейри çĕнĕлле аталанса пыракан тата экологи енчен те питĕ пысăк кăтартуллă ĕçлекен вунă регион шутĕнче тăрать.
Атом станцийĕн строительство ĕçне пурнăçлама Чăваш Енри организацисем тĕрлĕ таварсем хатĕрлесе кăлараççĕ, çакна специалистсем те пысăк хак параççĕ. "Росатом" Патшалăх корпорацийĕн тĕрлĕ пайĕсемпе регионта чи малта пыракан 15 ытла промышленноç предприятийĕсем кулленех тачă çыхăнура. Вĕсем: "ВНИИР" АУО, "ЧЭАЗ" АХО, НПП "ЭКРА" ТМЯО, "Электроприбор" АУО, "ЭЛАРА" АО, "Релематика" ТМЯО, "Электроавтомат" АУО, "Завод "Электроприбор" ПАО, "СКБ СПА" АУО, "КБ по ремонтным мастерским и фургонам" АУО, "Агромашхолдинг" ТМЯО, НПО "Каскад" АО, "НПВФ "СВАРКА" АХО, ПАО "Химпром" тата ыттисем те.
"Росатом" Патшалăх корпорацийĕн "Развитие продукции гражданского назначения" проектсен офисĕн ертÿçи Д.Байдаров хăйĕн сăмахĕнче электротехника кластерĕнчи Чăваш Енри предприятисем хăйсемпе паллаштарма килĕшнине ырланă. Малашне те пирĕн республикăпа тачă çыхăнса ĕçлеме хатĕррине асăннă. "Эпир партнерсемпе тĕллевлĕн ĕçлеме палăртнă. Раççейшĕн чи кирлĕ таварсемпе тивĕçтерессипе пĕрне-пĕри пулăшса пĕрле ĕçлеме хатĕрленнĕ. Ыйту уйрăмах санкци условийĕсенче пысăк пĕлтерĕшлĕ", - тенĕ сăмаха малалла тăснă май.
Д.Байдаров пирĕн регионти предприятисемпе пĕрле проектсене пурнăçа кĕртме пăхса хунине пĕлтернĕ, сăмахран, "ЭКРА" НПП çыхăну тытассине асăннă.
ЧР Пуçлăхĕ М.Игнатьев регионти предприятисем паянхи рынокра хăйсене кирлĕ пек шайра кăтартнине, сахал мар ĕçлĕ партнерсемпе тачă çыхăнура пулнине асăннă. Импорта улăштарассипе тĕлĕнмелле пысăк технологиллĕ паха таварсем тĕрлĕ çĕршывсене ăсатнине палăртнă. РФ Правительствин Председателĕ Д.Медведев тата РФ Хăрушсăрлăх Канашĕн секретарĕ Н.Патрушев пирĕн регионăн таварĕсене пысăка хурса хакланине пĕлтернĕ.
Регион Пуçлăхĕ М.Игнатьев тата çакна та палăртнă: "Субъектра пысăк квалификациллĕ специалистсене хатĕрлесе кăларас ыйту çине пысăк тимлĕх уйăратпăр. Регионсем хушшинчи центр хута каять. Унта шăпах та промышленноç комплексĕ валли тĕрлĕ специалистсем хатĕрленсе тухĕç. Центра йĕркелесе хута яма 1 млрд тенкĕ укçа пăхса хăварнă. Чăваш Республикинчи предприятисем пĕр-пĕрин хушшинче мала тухассишĕн кăна ĕçлемеççĕ, тĕнче шайĕнче хăйсен таварĕсене ăсатассишĕн тăрăшаççĕ", - тенĕ вăл. Д.Байдаров М.Игнатьева презентаци ĕçне хутшăннăшăн чĕререн тав тунă. "Республикăри организацисем регион Пуçлăхне хисеплени тата шанни никама та иккĕлентермест. Сирĕн витĕмлĕх тата та хăватланни куçкĕретех", - тесе сăмаха пĕтĕмлетнĕ сумлă ертÿçĕ. Кунсăр пуçне презентаци валли хатĕрленĕ доклада çав тери кăсăклă тунăшăн ырланă, "Росатом" Патшалăх корпорацийĕшĕн усăллă пулнине палăртнă.
Источник: "Урмарская районная газета"
Первоисточник: ЧР ПА пресс-служби.