23 августа 2017 г.
Хĕрлĕçырти "Тихонов А.Н." хресчен /фермер/ хуçалăхĕнче хĕрÿ ĕççи вĕçленсе пырать. Уяр çанталăкăн кашни минучĕпе туллин усă курма тăрăшаççĕ çĕр ĕçченĕсем.
Хресчен /фермер/ хуçалăхне ялти пултаруллă фронтовикăн, кăкăр тулли орденсемпе тата медальсемпе çĕнтерÿпе таврăннă А.Тихоновăн ывăлĕ, III степеньлĕ Ĕç Мухтавĕн орденĕн кавалерĕ Николай Аверьянович Тихонов йĕркелесе янă. Çемье подрячĕпе ĕçлеççĕ вĕсем. Тĕштырă культурисене пухса кĕртме кашниех хутшăнать. Хĕрÿ ĕççинче çитĕнтернĕ тырра пухса кĕртме ачисем Шупашкартан килеççĕ. Çемье пуçлăхĕ фермер хуçалăхне 2006 çулта йĕркелесе янă. Чи малтан ĕçлемелли çĕр лаптăкĕ пысăках пулман, майĕпен кашни çулах ÿстерсе пынă ăна. Халĕ 100 гектар шутланать. Тĕштырăпа пăрçа йышши культурăсем çитĕнтереççĕ. Эпир пынă кунхине Н.Гаврилов комбайнер Сăхăт юхан шыв хĕрринчи лаптăкра тухăçлă çитĕннĕ урпана вырса пĕтерчĕ. Н.Тихонов водитель урпа тиенĕ автомашинăпа çитрĕ те О.Григорьев, А.Петров, Д.Сергеев, Н.Карзаков рабочисем сортировкăпа тасатма тытăнчĕç.
2014 çулта фермер хуçалăхĕн тилхепине хăйĕн ывăлне, пултаруллă механизатора Алексея шанса пачĕ. Çакна палăртма кăмăллă: Алеша мĕнпур техникăна алла илнĕ тейĕн. Хăйех сухалать, курăк çулать, акать, комбайн штурвалĕ умне ларать, тырă турттарать тата ытти ĕçсене пурнăçлать.
Кăçал çанталăк чаплах пулманнипе тухăç начар пулать пуль тенĕччĕ. Ун пек пулмарĕ. Урпа тухăçĕ начар мар. Пухса кĕртмелли çурхи тулă юлчĕ. "Кăштах кĕтме лекет. Лайăх пулса çитеймен-ха", - пĕлтерет çамрăк фермер Алексей Николаевич.
Тыр-пул пухса кĕртесси пĕр кăлтăксăр пулмасть ĕнтĕ вăл. Техника ванать, А.Петров сварщик вара юсав ĕçĕсене пурнăçлама яланах хатĕр. Л.Александрова повар механизаторсене техĕмлĕ апат-çимĕçпе тивĕçтерет.
Сăнÿкерчĕкре сулахайран сылтăмалла: Д.Сергеев, Н.Тихонов, А.Тихонов, Н.Карзаков, А.Петров.
Источник: "Урмарская районная газета"
Первоисточник: А.ХОВАНСКИЙ.