12 августа 2017 г.
Пĕтĕм Чăваш тĕнчи хăйĕн кун-çулĕнчи чи пĕлтерĕшлĕ те мăнаçланмалли саманта - 55 çул каяллахи куна - аса илет. 1962 çулхи август уйăхĕн 11-мĕшĕнче пирĕн ентеш - Шуршăл каччи Андриян Николаев - космоса вĕçсе кайнă. "Восток-3" карапа ертсе пыраканĕ шăпах вăл пулнă.
Çак кунран тĕнче чăваш çине урăхларах пăхма пуçланă. Тен, чылай хутлăхра Чăваш Ен çинчен илтмен çын та пулнă, çак халăх ăçта, мĕн ĕçлесе пурăнни çинчен чухламан та. Пирĕн Андриян тĕнче уçлăхне кăна мар, Çĕр-планетăна та парăнтарнă: чăвашсем çинчен калаçтарма пуçланă, хутшăнусене çывăхлатнă, тус-юлташа нумайлатнă, Шуршăл çав самантра тĕнчери чи паллă кĕтес пулса тăнă.
1962 çулхи август уйăхĕн 12-мĕшĕнче тĕнче уçлăхне "Восток-4" карап çĕкленнĕ. Ун командирĕ - Павел Попович украин. Çапла икĕ карап ушкăнланса пĕрле вĕçме тытăннă. Космоса тăванла халăхсен ывăлĕсем - Гагаринпа Титов вырăссем, Николаев чăваш тата Попович украин - парăнтарнă.
Çак пулăм ентешĕн ятне вилĕмсĕрлетнĕ. Республикăри поэтсемпе писательсем хăйсен хастарлăхне ÿстернĕ, космонавтсене халалласа сăвă-поэма шăрçаланă, художниксем алла киçтĕк, кăранташ тытнă, вĕсен сăнне пир çине куçарнă.
Источник: "Урмарская районная газета"
Первоисточник: Р.ИВАНОВА, библиотекарь.