05 августа 2017 г.
Кăçал çанталăк йĕпе-сапаллă тăнăран уй-хирти тыр-пулăн шăпи пĕрре те çăмăл пулманни паллă. Çын çÿллĕш çитĕннĕ тĕш тырă вырăн-вырăнпа выртса пĕтни тата йĕпене пула вăл тĕрлĕ чир-чĕрпе аптрама пултарни пурне те канăçсăрлантарать.
Вăрмар район администрацийĕн пуçлăхĕн ĕçĕсене пурнăçлаканĕ Н.Павлов тата райадминистрацин ялхуçалăхĕпе экологи пайĕн начальникĕ Н.Николаев тăтăшах районти ялхуçалăх предприятийĕсемпе хресчен /фермер/ хуçалăхĕсенче пулаççĕ, унти ĕç-хĕлпе паллашаççĕ. Иртнĕ кунсенче вĕсем "Чăвашхлебопродукт" акционерсен обществин пирĕн районти тырă йышăнакан пунктне çитсе курса çĕнĕ тырăна кĕтсе илме еплерех хатĕрленни пирки кăсăкланнă.
"Эпир çĕнĕ тырă йышăнма ĕç хăрушсăрлăхне тĕпе хурса пĕтĕмпех хатĕрленсе çитнĕ. Татти-сыпписĕр тырă йышăнма пултаратпăр, вĕсене вырнаçтармалли складсене дезинфекцилесе тирпейленĕ, производствăпа техника лабораторийĕ ĕçлет. Çĕнĕ тырă складсене кĕрсе вырнаçиччен нумай тĕрĕслев витĕр тухать. Иртнĕ çул пирĕн пата июлĕн 19-мĕшĕнчех çĕнĕ тырă килме пуçланă пулсан, кăçал чылай каярах юлать", - тет предприяти директорĕ В.Александров хăйсен ĕçĕ-хĕлĕпе паллаштарнă май. Енчен те тырă нÿрĕклĕхĕ кондици виçипе пĕр килмесен вĕсене склада упрама хуриччен типĕтме икĕ сушилка ĕçлет.
Николай Анатольевич Павлов тырă йышăнакан пунктра вăй хуракансене ума лартнă тĕллевсене пурнăçлама ăнăçу суннă. Тыр-пул шăпи пурне те шухăшлаттарать, çавăнпа та ĕçре татах та яваплăха ÿстерме сĕннĕ.
Источник: "Урмарская районная газета"
Первоисточник: Н.ШИШКИНА.