29 июля 2017 г.
Ялти стадион Пысăк Енккассисемшĕн чи илемлĕ те юратнă вырăн. Кунта çамрăксемпе вĕтĕр-шакăр яланах йышлă. Нумаях пулмасть çамрăк футболистсем «Сăран мечĕк-2017» вăйă парнишĕн ăмăрту ирттерчĕç.
Ку хутĕнче вара ялти урам командисем В.Гаврилов салтак-интернационалиста асăнса иртекен йăлана кĕнĕ мини-футболăн XI турнирĕнче ăмăртрĕç. Хĕрÿ тупăшура 5 команда куçса çÿрекен Кубокшăн вăй виçрĕ. Футболистсене саламлама Пысăк Енккасси ял тăрăхĕн пуçлăхĕ А.Васильев, ялти вăтам шкул директорĕ Г.Архипова, В.Гавриловăн вĕрентекенĕ - Раççей тава тивĕçлĕ тренерĕ, ЧР физкультурăпа спортăн тава тивĕçлĕ ĕçченĕ Ю.Архипов килнĕ. Çавăн пекех В.Гавриловăн çывăх юлташĕ, пĕрле Афганистан çĕрĕ çинчи хĕрÿ çапăçусене хутшăннă Пинер каччи О.Ширшов, 2012 çулта Лодонра пулса иртнĕ çуллахи XXX Олимп вăййисен пăхăр призерĕ Т.Архипова пурне те ăшшăн саламларĕç. Пухăннисене пурне те Мурманскри «Чăваш Ен» автономи председателĕ, Виктор Гавриловăн пиччĕшĕ, экономика ăслăлăхĕсен кандидачĕ Валериан Гаврилов тав сăмахĕ каларĕ, ăмăртăва йĕркелеме пулăшнă юлташсене хавхалантарса парнесемпе чысларĕ. Ырă, сывă пурнăç йĕркине, ялта спорт юхăмне çамрăксем хушшинче анлă сарас енĕпе пысăк тÿпе хывнăшăн ял тăрăхĕн пуçлăхĕ А.Васильев В.Гаврилова Тав хучĕпе чысларĕ.
Çивĕч тупăшура 1-мĕш вырăна тата куçса çÿрекен Кубока 6-мĕш хут Карл Маркс урамĕн команди çĕнсе илчĕ. Иртнĕ çулхи чемпионăн - Çамрăксен урам командин - 2-мĕш вырăнпа çырлахма тиврĕ. Турнир таблицин 3-мĕш йĕркине Çут урам команди йышăнчĕ. Николаевпа Академи урамĕсен ачисем те хĕрÿ кĕрешрĕç. Турнирăн «Чи вăйлă тапăнса выляканĕ» ята Çамрăксен урамĕнчи Георгий Сидоров, «Чи сыхă хÿтĕлевçĕ» ята Володя Гаврилов, «Чи лайăх вылякан» ята Костя Леонтьев çĕнсе илчĕç. Никитăпа Вадим Никифоровсен, Евгенийпе Василий Архиповсен, Алексей Григорьевăн вăйăри пултарулăхне куракансем пысăк хак пачĕç.
Турнир вăййисене ирттерме Лев Уливановпа Андрей Иванов судьясем пулăшрĕç.
Источник: "Урмарская районная газета"
Первоисточник: Н.ГАВРИЛОВ. Пысaк Енккасси.