29 июля 2017 г.
Вăрмар район администрацийĕн пуçлăхĕн ĕçĕсене пурнăçлаканĕ Н.Павлов ĕçлĕ визитпа Шăхаль ял тăрăхне çитсе курнă. Ял тăрăхĕн пуçлăхĕпе А.Семеновпа, райадминистрацин ялхуçалăхĕпе экологи пайĕн начальникĕпе Н.Николаевпа, райадминистрацин тĕп специалист-эксперчĕпе - строительствăпа çул-йĕр, çурт-йĕрпе коммуналлă хуçалăх пайĕн тĕп инженерĕпе Н.Ивановăпа пĕрле "Шигали" ялхуçалăх производство кооперативĕн ĕçĕ-хĕлĕпе паллашнă.
Вырма вăхăчĕ çитсе пырать. Кĕçех район уй-хирĕсене тыр-пул пуçтаракан комбайнсем тухĕç. Н.Павлов хуçалăхра вырмана епле хатĕрленнипе кăсăкланнă. Предприяти ертÿçи В.Иваншкин палăртнă тăрăх, вырмана хатĕрленес ĕç вĕресе тăрать. Механизаторсем ялхуçалăх техникине юсаса тĕрĕслеççĕ. Хуçалăхра уй-хире 4 комбайн тухĕ. Пурĕ 1050 гектар тĕш тырă тата пăрçа йышши культурăсем пуçтарса кĕртмелле пулĕ. "Комбайнерсем юсав ĕçĕсене яваплăха туйса пурнăçлаççĕ. Тыр-пулăн пулас тухăçлăхĕ тÿрремĕнех техникăран тата коллективăн килĕшÿллĕ ĕçĕнчен килнине вĕсем лайăх ăнланаççĕ. Техникăна юсанисĕр пуçне тыр-пула йышăнмалли ятарлă вырăнсене хатĕрлес ĕç те пырать. Чи пĕлтерĕшли - çанталăк пăтăрмахсем кăларса ан тăраттăр, ытти енĕпе вара ума лартнă тĕллевсене пурнăçлама пултарăпăр эпир", - палăртнă Владимир Яковлевич калаçнă май. Унсăр пуçне хуçалăхра кĕрхи культурăсене акса хăварма çĕр хатĕрлеççĕ. Паянхи куна çак ĕç 300 гектар çĕр лаптăкĕ çинче пулнă та ĕнтĕ. Райадминистраци пуçлăхĕн ĕçĕсене пурнăçлаканĕ Н.Павлов коллектива вырма ĕçĕсене кĕске вăхăтра ирттерсе яма ăнăçу суннă.
Малалла яваплă çынсем Шăхаль ялĕнче автомобиль çулĕн строительстви епле пынипе паллашнă. Çак ĕç "Ял территорийĕсен 2014-2017 çулсенчи тата 2020 çулчченхи тапхăрти çирĕп аталанăвĕ" федераллă тĕллевлĕ программа йĕркипе пулса пырать.
2,412 километр тăршшĕ объектăн 47 миллион ытла тенкĕлĕх строительствине "Автодорсервис" тулли мар яваплă общество пурнăçлать. Хальхи вăхăтра строительство объектĕнче çĕр ĕçĕсене вĕçленĕ, хăйăр тата вак чул сараççĕ, шыв юхтармалли пăрăхсене вырнаçтараççĕ. Кунсерен кунта 18 çын вăй хурать, ĕçсене тума пурĕ 8 единица техника уйăрнă. Пурнăçланă ĕçсене Николай Анатольевич хакланă, вĕсене контрактпа килĕшÿллĕн вăхăтра вĕçлемеллине палăртнă.
Источник: "Урмарская районная газета"
Первоисточник: Райадминистраци сайтeнчен.