21 июня 2017 г.
Июнь уйăхĕн 3-мĕш вырсарникунĕнче Раççейре медицина ĕçченĕсен кунне уявлаççĕ. Çак професси уявне тухтăрсем, медицина ĕçченĕсем, лаборантсемпе санитарсем паллă тăваççĕ.
Çак ятпа Вăрмарти Культурăпа кану çуртĕнче савăнăçлă пуху иртнĕ. Уяв мероприятине районти сывлăх сыхлавĕн специалисчĕсемпе ветеранĕсем хутшăннă. Çын сывлăхĕшĕн ырми-канми тăрăшакан пархатарлă професси представителĕсен ячĕпе çак кун нумай ăшă сăмахсем каланă. Медицина ĕçченĕсене професси уявĕ ячĕпе район администрацийĕн пуçлăхĕн ĕçĕсене пурнăçлаканĕ Н.Павлов саламланă: "Çынсем сире чи хаклине - хăйсен пурнăçĕпе сывлăхне шанса параççĕ. Тавах сире профессионализмшăн, ĕçченлĕхшĕн, ăшăлăхпа ăста аллусемшĕн, çирĕп сывлăх, ăнăçу, телей сунатăп". Районти сывлăх сыхлавĕн чи лайăх ĕçченĕсене Раççей Федерацийĕн тата Чăваш Республикин, Вăрмар район администрацийĕн Хисеп тата Тав хучĕсене панă. Хисепе тивĕçнисем хушшинче тухтăрсемпе фельдшерсем, медицина сестрисемпе лаборантсем пулчĕç.
Чыслав хыççăн мероприяти чăваш эстрада артисчĕсен савăнăçлă концерчĕпе тăсăлнă.
Источник: "Урмарская районная газета"
Первоисточник: Н.Шишкина.