17 июня 2017 г.
.jpg "Çитĕнĕвĕсем мухтанмалăх пур")
Кун-çул утти ытларах ĕçпе çыхăннă. Кашни çын мĕн пĕчĕкренех хăй килĕштерекен профессине алла илес тесе тăрăшать.
Чĕкету ялĕнчи ĕçе юратакан Алексеевсен çемйинче кун çути курнă Владимир Алексеевич Купцов пирки те çакнах каламалла. Йышлă çемьере çитĕннĕскерĕн алла усса ларма та, усăсăр урамра чупса çÿреме вăхăчĕ те, кăмăлĕ те пулман. Кĕлкешри шкултан вĕренсе тухсан пĕр вăхăт "Россия" совхозăн 3 уйрăмĕнчи уй-хир бригадинче вăй хунă. Ĕçрен ÿркенмен пултаруллă çамрăка Çитмĕш ялĕнчи Д.Михайлов тракторист асăрхать те хăйĕн тракторĕ çинче плугарь пулса ĕçлеме чĕнет. В.Купцов вара хаваспах килĕшет. Пĕр вăхăт ĕçленĕ хыççăн ăна районти автошкула водителе вĕренме кайма сĕнеççĕ. Унтан ăнăçлă вĕренсе тухсан унăн салтака кайма та çул çитет. Салтакра та чăваш каччи ырă ятпа палăрса тăрать. Тăван çĕршыв умĕнчи тивĕçе пурнăçласа таврăнсан пĕр вăхăт районти Пăртас больницинче водительте вăй хурать. Каярахпа ДПМКра КамАЗ çинче, сĕтел-пукан фабрикинче ГАЗ-53 автомашинăпа водительте ĕçлет. Пурнăç улшăнса пынă май "ММК-сервис" тулли мар яваплă обществăна ĕçлеме куçать. Пур çĕрте те руль алăран каймасть. "Аякри çула тухмалла-и, хамăр республикăри тĕрлĕ ялсемпе хуласене каймалла-и - яланах автомашинăна юсавлă тытать. Тĕрĕссипе каласан, вăл водитель ĕçне кăна пурнăçламасть... ытти пĕр ĕçрен те пăрăнса тăмасть. Çынна яланах пулăшма хатĕр вăл. Владимир Алексеевича пур яваплă ĕçе те шанма пулать. Миçе çултине пăхмасăрах вăл пĕр çулталăкра Мускав хулине 40-50-шар рейс тăвать. Унсăр пуçне Самарăна, Ульяновска, Оренбурга, Уфана, Тулана, Магнитогорска саккаспа çитсе килет. Руль умĕнче В.Купцов пулсан яланах шанчăклă, хамăра та лăпкă туятпăр. "Светлана" тулли мар яваплă обществăна та Владимир Алексеевич çÿрекен автомашинăпа тăтăшах пулăшу кÿретпĕр. Вĕсен коллективĕ те ырăпа кăна калать ĕçрен ÿркенмен водитель пирки. Ун пек çынсем пирки "разведкăна кайма юрăхлă" теççĕ халăхра. Хăйне шанса панă ĕçе палăртнă вăхăтра, тĕплĕн пурнăçлать. Унăн çитĕнĕвĕсемпе мухтанмалăх пур тесе çирĕплетсех калама пултаратăп", - тет "ММК-сервис" тулли мар яваплă обществăн директорĕ В.Белоусов Владимир Алексеевич пирки калаçнă май.
Ахальтен мар ĕнтĕ руль умĕнче нумай çул вăй хунă Владимир Алексеевича районти ĕçпе юрă тата спорт уявĕнче - Акатуйра Чăваш Республикин Министрсен Кабинечĕн председателĕ - Чăваш Республикин Финанс министрĕ С.Енилина "Чăваш Республикин тава тивĕçлĕ транспорт ĕçченĕ" Хисеплĕ ята парса наградăларĕ. Ĕçне кура - хисепĕ. Тарпа пиçĕхсе илнĕ Хисеплĕ ятшăн савăнмалăх та мухтанмалăх та пур.
Источник: "Урмарская районная газета"
Первоисточник: А.НИКОЛАЕВА.