10 июня 2017 г.
Хăмлана мĕн авалтан "симĕс ылтăнпа" танлаштарнă. Çакă ахальтен марах, мĕншĕн тесен хăмла çитĕнтерсе ăна пуçтарса кĕртсе кирлĕ вырăна çитересси пĕрре те çăмăл ĕç маррине маларахри çулсенче хăмла татса кăна курнисем те чухлаççех пулĕ.
Маларахри вăхăтра хăмла лаптăкĕсем йĕри-тавра пулнă-ха. Ăна çитĕнтерсе чапа тухнă уйрăм çынсем те сахал мар пирĕн районта. Самана тĕрлĕ еннелле сулăннă вăхăтра хăмла участокĕсем те кашлама пăрахрĕç. Анчах та малашлăха тĕллевлĕн пăхакансем çак культурăна тепĕр хут аталантарса ярассишĕн ĕçлеме пачах та чарăнман тесен те тĕрĕсех пулать пулĕ. Вĕсенчен пĕрисем - Чулкас ялĕнче пурăнакан Дмитриевсем. "АгроРесурсы" тулли мар яваплă общество йĕркелесе Чăваш Республикинче чи нумай лаптăк хăмла плантацийĕ лартнă. Паянхи куна предприятинче 30 гектар çинче хăмла çитĕнет, вĕсенчен 26 гектарĕ çинчен тухăçлă хăмла татса илеççĕ, 4 гектарĕ - çамрăк-ха. Ир çитĕнекен "Ранний Московский", "Истринский", "Подвязный" сортсем тухăçĕпе савăнтараççĕ. Çамрăк хунавсенчен - "Флагман", "Фаворит" сортсем çитес вăхăтсенче çимĕçĕпе савăнтарасса кĕтеççĕ хăмлаçăсем. Тухăç кĕтиччен малтан мĕн чухлĕ вăй хумаллине харпăр хăй ĕçлесе курнисем кăна ăнланаççĕ пулĕ. Хăмла çитĕнтерме предприятинче хальхи йышши тĕрлĕ техникăсем - хăмла татакан виçĕ комбайн, Чехинче туса кăларнă хăмла типĕтмелли икĕ сушилка, хăмлана гранулăмалли тата пресламалли агрегатсем, пысăк склад, машинăпа трактор паркĕ пур, вĕсенчен те хаклисем вара - хăмла çитĕнтерме пултаракан кадрсем. "Кадрсем пур ĕçе те татса параççĕ", - тенĕ халăхра. Ку чăнахах та çапла. Кунта чăтăмлисемпе харсăррисем кăна вăй хураççĕ тесе калас килет. Мĕншĕн тесен вĕсем хăмлана лартса çитĕнтереççĕ кăна мар татса тирпейлеççĕ, туянакан ыйтакан кондицие çитерсе тĕрлĕ çĕре ăсатаççĕ. Кунта хăмла йăран çинчен склада кĕрсен тепĕр хĕрÿ тапхăр пуçланать. Предприяти директорĕ С.Дмитриев каланă тăрăх вĕсем хăмлана Раççейĕпех ăсатаççĕ иккен. Унпа çăкăр пĕçернĕ çĕрте те усă кураççĕ. Фармацевтсен компанийĕнче те хăмла чи кирлĕ компонентсенчен пĕри. Палăртса хăварма кăмăллă: пирĕн районта туса илекен хăмлапа хамăр Чăваш Енри Муркаш районĕнчи сăра тăвакан заводра та усă курса тутлă та техĕмлĕ Чăваш сăрине вĕретеççĕ. Предприятинче вăй хуракансен тĕллевĕ - хăмла тухăçлăхне ÿстерсе, пахалăхне Пĕтĕм тĕнчери стандарт шайĕнче тытса пырасси тата хăйхаклăхне чакарасси.
Ахальтен мар ĕнтĕ вĕсем хăйсем ĕçлеме тытăннăранпа кашни çул тенĕ пекех тĕрлĕрен выставкăсене хутшăнса призлă вырăнсене çĕнсе илеççĕ, хаклă парнесене тивĕçеççĕ. Пирĕн районти "АгроРесурсы" тулли мар яваплă обществăн ĕçĕпе А.Вальшников учредитель те кăмăллă. Çапла пулмасăр, ку предприяти кĕске вăхăтрах ытти хăмлаçăсем хушшинче пысăк авторитет çĕнсе илсе ырă ята тивĕçнĕ. Акă, юлашки тĕслĕх те вĕсен ĕçĕнчи ăнăçăва тепĕр хут çирĕплетсе парать. Нумаях пулмасть Сочи хулинче иртнĕ "Сăра" Пĕтĕм тĕнчери форумран пирĕн район хăмлаçисем хăйсен продукцийĕпе палăрса ылтăн медальпе килнĕ. Выставкăна тăратнă пирĕн районти предприятин хăмла продукцийĕ тивĕçлĕ награда илме пултарни пуриншĕн те пысăк çитĕнÿ.
Источник: "Урмарская районная газета"
Первоисточник: А.НИКОЛАЕВА.