03 июня 2017 г.
Тикашра пурăнакан Светлана Григорьевнăпа Михаил Яковлевич Яковлевсем икĕ ывăл ача çуратса ÿстерсе пурнăç çулĕ çине кăларнă. Николай ывăлĕ, 1974 çулхи январĕн 27-мĕшĕнче çуралнăскер, шкулта вĕреннĕ чухнех спортпа туслă пулнă. Ялта шкултан вĕренсе тухнă хыççăн Шупашкарти 19-мĕш номерлĕ профессипе техника училищине вĕренме кĕрет. Электросварщик профессине алла илет. Часах унăн Раççей çарне кайма черет çитет. Рязаньти сывлăш десантниксен çарне разведка ротине лекет. Кунта вара спортри ăсталăха ÿстерме условисем татах та лайăхрах. Алла-аллăн çапăçас енĕпе полкра, дивизире мала тухассишĕн ирттернĕ ăмăртусенче яланах малти вырăнсене çĕнсе илет, спорт мастерĕн кандидачĕн нормативне пурнăçлать. Салтакран таврăнсан та «Гранит» спорт клубĕнче хăйĕн спортри ăсталăхне малалла туптать.
Пурнăç малаллах шăвать. Салтакран тĕрекленсе таврăннă çамрăк каччă хăйсен ялĕн хĕрĕпе, юратнă савнийĕпе, Надьăпа пĕрлешсе çемье çавăраççĕ. Пурăнма Шупашкара куçса каяççĕ. Çамрăк мăшăрăн 1996 çулхи июлĕн 8-мĕшĕнче ывăл çуралать. Сергей ят параççĕ ăна. Кăштах ÿссе çитĕнсен Шупашкарти 40-мĕш номерлĕ вăтам шкула вĕренме çÿреме пуçлать. Вăл ашшĕ çулĕпе каять, çамрăклах спорта килĕштерет. 7 çула çитсен карате спортне кăмăллать. 9 çулта чухне дзюдо тата самбо кĕрешĕвĕсене килĕштерет. 16 çул тултарсан çар самбо кĕрешĕвĕ енĕпе ăсталăха туптама пуçлать. Раççей тава тивĕçлĕ спорт мастерĕ, кикбоксинг енĕпе 5 хут тĕнче чемпионĕ Алексей Соловьев тренер пулăшнипе тĕрлĕ хуласемпе çĕршывсенче ирттернĕ ăмăртусемпе турнирсенче çитĕнÿ хыççăн çитĕнÿ тăвать. Çар самбовĕ, алла-аллăн çапăçас тата дзюдо енĕпе спорт мастерĕн кандидачĕн нормативĕсене пурнăçлать.
Пур енлĕ аталаннă 20 çулхи çамрăк каччăн спортри кăтартăвĕсем чăннипех те тĕлĕнтереççĕ, савăнтараççĕ. Çар искусствисен кĕрешĕвĕ енĕпе Мускавра ирттернĕ Раççей чемпионатĕнче чăваш каччи çĕнтерÿçĕ пулса тăнă. Хутăш çар кĕрешĕвĕпе Хусанта ирттернĕ Пĕтĕм тĕнчери турнирта вăлах çĕнтернĕ. Хутăш çар искусствисен кĕрешĕвĕн чемпионĕсен Кубокне çĕнсе илессишĕн Шупашкарта ирттернĕ ăмăртура пĕрремĕш вырăн йышăннă. Алла-аллăн çапăçассипе Раççейре мала тухассишĕн ирттернĕ тупăшăвăн, çар самбо кĕрешĕвĕпе мастерсен турнирĕсен тата дзюдо енĕпе Пĕтĕм тĕнчери турнирсен призерĕ. Çар самбо кĕрешĕвĕ енĕпе Пĕтĕм Раççейри турнирсен çĕнтерÿçи.
Кăçалхи апрелĕн 29-мĕшĕпе майăн 1-мĕшĕсенче Италири Сан-Марино хулинче хутăш çар искусствисен кĕрешĕвĕн тĕнче Кубокне çĕнсе илессишĕн ирттернĕ ăмăрту халĕ те асран тухмасть-ха Сергейăн. Çивĕч кĕрешÿре вăл тĕнче Кубокне çĕнсе илнĕ.
Хутăш çар искусствисен кĕрешĕвĕ енĕпе Сергей Яковлев Раççей спорт мастерĕн нормативне пурнăçланă. Халĕ вăл И.Н.Ульянов ячĕллĕ Чăваш патшалăх университетĕнче юридици факультетĕнче виççĕмĕш курсра вĕренет.
Эпир вара ăна вĕренÿре те, спортра та ăнăçусем сунатпăр.
Источник: "Урмарская районная газета"
Первоисточник: А.ХОВАНСКИЙ.