31 мая 2017 г.
ЧР Пуçлăхĕ М.Игнатьев кашни эрнере пулакан ĕçлĕ планеркăна ЧР Министрсен Кабинечĕн членĕсемпе тата федерацин тĕрлĕ службисен регионти уйрăмĕсен пуçлăхĕсемпе ирттернĕ. Ку хутĕнче канашлу ĕçне пухăннисем çурхи уй-хир ĕçĕсене тĕплĕн пăхса тухса сÿтсе явнă. ЧР Министрсен Кабинечĕн Председателĕн çумĕ - ялхуçалăх министрĕ С.Артамонов республикăри уй-хир ĕçĕсен пĕтĕмĕшле кăтартăвĕсем пирки чарăнса тăнă. Кăçал çурхи тыр-пула Чăваш Енре пĕтĕмпе 199,5 пин гектар çĕр лаптăкĕ çинче акса хăварнине, вăл пĕтĕм планран 96,9 процентпа танлашнине каланă. Пĕтĕмпе 10 муниципалитетра çурхи акана вĕçленĕ тесе пĕлтернĕ министр, плана туллин тивĕçтернине асăннă. Пахча-çимĕç культурине кăçал 743 гектар çĕр çинче лартса хăварнине пĕлтернĕ. Кăçал хăмла лартса çитĕнтерес ĕç çине те пысăк тимлĕх уйăрнă. Республикăра халлĕхе ăна 89 гектар лартнă. Паянхи кунпа регионта çĕрулмине те сахал мар лартса хăварнă, халлĕхе унăн лаптăкĕ 6,4 пин гектарпа танлашать. Ытти регионсенчи пекех, пирĕн республикăра та кăçалхи çул çĕрулмин лаптăкĕ кăштах пĕчĕкленни сисĕнет. «Енчен те çак ĕçе эпир пăрахăçласан, пирĕн рынокри ĕçе ытти субъектсем туртса илме пултараççĕ. Тепĕр тесен, çĕрулмин хакĕ те чылай ÿсни куçкĕретех. Кун пекки нумайранпах пулманччĕ», - тесе каланă Чăваш Ен Пуçлăхĕ М.Игнатьев.
С.Артамонов кăçал Чăваш Республикинчи агропромышленноç пайне аталантарма пĕтĕмпе 2331,1 млн тенкĕ куçарса панине палăртнă. Çак кăтартăва пĕлтĕрхи шайпа пăхас пулсан 10 процент пысăк пулни те курăнать. Çĕршыв Правительстви малашне те ялхуçалăхне патшалăх пулăшăвĕпе тивĕçтерес ыйту çине пысăк тимлĕх уйăрать. Кăтартăва 2017 çулта 9 млрдран 225 млрд çитерме палăртнă. Вĕсенчен 4,1 млрд çăмăллăх инвестици кредичĕсем уйăрма, 3 млрд выльăх-чĕрлĕх ĕрчетекенсене, хăмла пахчи ешертекенсене, нумай çул ÿсекен курăка вăй илтерме, питомниксем хута яма уйăрасси паллă. Кунсăр пуçне АПК предприятийĕсене модернизацилеме тата тĕрлĕ строительство ĕçне пурнăçлама 2,25 млрд тенкĕ пăхса хăварма йышăннă. Ветеринари пайĕнче усă куракан эмелсем туянма 1,5 млрд тенкĕ уйăрнă. ЧР шалти ĕçсен министрĕ С.Неяскин хăйĕн сăмахĕнче хуçалăхсенче сĕрмелли-çунтармалли хатĕрсене, техника таврашне час-часах вăрланине каланă. Министр хушма мерăсем йышăнса хăварма чĕнсе каланă. ЧР Министрсен Кабинечĕн Председателĕн çумĕ - экономика министрĕ В.Аврелькин Республика кунне хатĕрленсе ирттернĕ ĕçсем пирки каласа хăварнă. ЧР культура министрĕ К.Яковлев «Раççей çăлкуçĕсем» халăх пултарулăхĕн Пĕтĕм Раççейри фестиваль пирки каласа кăтартнă.
Источник: "Урмарская районная газета"
Первоисточник: ЧР ПА пресс-служби.