31 мая 2017 г.
«Çеçпĕл» кинотеатрта сахал йышлă халăхсене халалланă Пĕтĕм тĕнчери кинофестиваль иртрĕ.
Вуннăмĕш кинофестивалĕн программи питĕ пуян. Курас тенĕ фильм пайтах, анчах харăсах пурин валли вăхăт тупма май çук. Унсăр пуçне ятарлă проектсем, кăсăклă тĕлпулусем, ăсталăх класĕсем... Ĕлкĕр кăна. Ытти çулти пекех Наци библиотекинче регионсенче ÿкернĕ ĕçсене кăтартаççĕ. Куракансем «Анай» /Удмурти/, «Чистый лист» /Мускав/, «Семейные хлопоты», «Айсылу», /Тутарстан/, «Сурăм хĕрĕ», «Фуга» /Чăваш Ен/, «Нюуса» /Байкал леш енчи край/ тата ытти фильмпа паллашнă.
Илемлĕ фильмсен конкурсне тăратнă ĕçсене «Çеçпĕлте» кăна мар, «Синема-5», ытти кинозалта та пăхма май пур. Шупашкар çыннисем Андрей Кончаловскин картинисен ретроспективлă кăтартăвĕпе кăсăкланнине эпир те курса ĕнентĕмĕр. «Оскар» премие илме кăçал тăратнă «Рай» кинокартинипе паллашас текен уйрăмах йышлă.
Пултарулăх каçĕсем вăл е ку актерпа çывăхрах паллашма май параççĕ. Чăваш патшалăх оперăпа балет театрĕнче РСФСР халăх артистки Зинаида Кириенко, «Çеçпĕлте» Раççей халăх артисчĕ Владимир Новиков, Раççей тава тивĕçлĕ артистки Галина Бокашевская халăхпа тĕл пулнă.
Шупашкарти кинофестиваль сахал йышлă халăхсен кинематографне аталантарас тĕлĕшпе ĕçленине тĕпе хурса çулленех «çавра сĕтелсем» ирттереççĕ. Форумăн иккĕмĕш кунĕнчех Наци библиотекинче черетлĕ тĕлпулу йĕркеленчĕ. Унта Чăваш Ен, Пушкăртстан, Тутарстан, Саха-Якут, Удмурти, Франци кинематографисчĕсем хутшăнчĕç. ЧР культура министрĕн çумĕ Вячеслав Оринов, кинофестивалĕн программа директорĕ Сергей Лаврентьев, регион фильмĕсен конкурсĕн жюри председателĕ Ходжакули Нарлиев режиссер, сценарист сăмах илчĕç. Йывăрпа пулсан та ĕç малалла пынине, куракан умне кăларма тивĕçлĕ фильмсем çуралнине палăртрĕç.
Источник: "Урмарская районная газета"
Первоисточник: «Хыпар» хаcатран