17 мая 2017 г.
"Патшалăх вăл - пысăк çемье, çемье вара - юрату çинче тытăнса тăракан пĕчĕк патшалăх" пĕлтерет халăх ăс-хакăлĕ. Чăваш Ен Пуçлăхĕ М.Игнатьев ЧР Патшалăх Канашне янă Çырăвĕнче те çапла калать: "Пирĕн çемьесем çирĕп! Чăваш Енре мăшăрлану тата çемье яланах хисепре пулнă".
Çемье кунне Раççейре 1993 çултанпа анлăн паллă тăваççĕ. Пирĕн тăрăхра та çак çĕршывшăн, çемьешĕн пысăк пĕлтерĕшлĕ уява çырăнтару залĕнче çав тери ăшă лару-тăрура кĕтсе илчĕç. Кунта Кивĕ Вăрмар ялĕнчи Ольга Семеновнăпа Николай Максимович Максимовсене сумлă юбилейпе - ылтăн туйпа - 50 çул пĕрле шăкăл-шăкăл калаçса, пĕрне-пĕри ăнланса пурăннă, çак кăмăллă та чыслă уявпа саламлама Вăрмар район администрацийĕн пуçлăхĕ А.Тихонов, Кивĕ Вăрмар ял тăрăхĕн пуçлăхĕ Н.Борисов, ЗАГС пайĕн начальникĕ В.Волкова, ывăлĕсем хăйсен çемйисемпе, хăнасем пухăннă. Чи малтанах вĕсен пурнăç çул-йĕрĕпе Валентина Альбертовна паллаштарчĕ. Ольга Семеновнăпа Николай Максимович 1967 çулхи майăн 7-мĕшĕнче пĕр çемьене тĕвĕленеççĕ. Виçĕ ывăл çуратса пурнăç çулĕ çине кăлараççĕ. Паянхи кун 6 мăнукĕпе савăнса пурăнаççĕ. Ĕçчен те сăпайлă, пурнăçа юратакан хисеплĕ Максимовсем-аслисем хăйсен тĕпренчĕкĕсене те çак пахалăхлă енсене юратма вĕрентсе ÿстернĕ. Ку вăл ывăлĕсем мăшăрĕсемпе амăшĕпе ашшĕ умĕнче чĕререн каланă ырă сăмахсенчен те аван палăрчĕ. Вĕсемех чечек çыххи, хисеплĕ мăшăрсен ылтăн туй пулнă май ятарласа хатĕрленĕ сăн ÿкерчĕкне те парнелерĕç. Унтан райадминистрацин пуçлăхĕ А.Тихонов сăмах каларĕ: "Ырă кун пултăр, кунта килнĕ хисеплĕ Ольга Семеновнăпа Николай Максимович, чаплă лару-тăрăва хутшăнакансем. Сире, ырă та çутă уявпа - Пĕтĕм тĕнчери Çемье кунĕпе кăмăлтан саламлатăп. Савăнăç-и, пăшăрханмалли самантсем-и - вĕсене эпир, паллах, хамăра çывăх çынсемпе пайлатпăр. Шăпах юратнă кил-йыш пире çынсене хисеплеме вĕрентсе ÿстерет. Сумлă çемьесем районта пурришĕн питĕ хавас. 2017 çул Амăшĕпе Ашшĕн çулталăкĕ пулнă май Çемье уявне те ăнах халаллатпăр. Нумай пурăнакан çемьесем хальхи вăхăтра ÿссех пыраççĕ. Уяв ячĕпе саламласа, мĕнпур ыррине сунса Александр Иванович çемье ăшшине упраканне чечек çыххи парнелерĕ, çемье тĕрекне тытса пыракана район администрацийĕнчен Тав хутне пачĕ. Паллах, Тав çырăвне Ольга Семеновнăпа Николай Максимович Максимовсем хурлăха та, савăнăçа та пĕрле пайласа, пĕрне-пĕри ăнланса, çирĕп те туслă çемьене чĕртсе, ун вучахне упраса пурăнма пултарнăшăн тивĕçрĕç. Çакă паянхи çамрăксемшĕн ырă тĕслĕх пулнине палăртса çак ял тăрăхĕн пуçлăхĕ Н.Борисов сăмах каларĕ. Çемье юбилярĕн ачисем, вĕсен мăнукĕсем çак паллă уявпа чунтан саламланипе пĕрлех аслă ăрурисем пек пулма тăрăшнине пĕлтерчĕç.
Источник: "Урмарская районная газета"
Первоисточник: И.АНТОНОВА.