29 апреля 2017 г.
Вырăнти хăй тытăмлăх кунне халалласа Шупашкарта иртнĕ савăнăçлă мероприяти пирки эпир пĕлтернĕччĕ ĕнтĕ. Вырăнти хăй тытăмлăх органĕсен чи лайăх ĕçченĕсем çак кун патшалăх наградисене тивĕçнĕ пулнă. Вĕсем хушшинче Вăрмар район представителĕсем те пулнă. Вырăнти хăй тытăмлăх аталанăвне тÿпе хывнăшăн Энĕшпуç ял тăрăхĕн пуçлăхĕ Олег Анатольевич Иванов ЧР Хисеп грамотине тивĕçнĕ. Çавăн пекех çак кун вырăнти хăй тытăмлăхра нумай çул тÿрĕ кăмăлпа ĕçленĕшĕн райадминистрацин организаципе контроль тата кадрсен ĕçĕн пайĕн вырăнти хăй тытăмлăх органĕсемпе ĕçлекен тата контрольлекен тĕп специалист-эксперчĕ Светлана Дмитиревна Хованская ЧР Патшалăх Канашĕн Хисеп грамотине илнĕ.
Çавăн пекех апрелĕн 26-мĕшĕнче Вăрмар район администрацийĕн ларусен залĕнче Вырăнти хăй тытăмлăх органĕсен ĕçченĕсене халалланă савăнăçлă мероприяти иртнĕ. Хальхи вăхăтра муниципалитет службин пысăк та пултаруллă командине мал ĕмĕтлĕ руководитель - район администрацийĕн пуçлăхĕ А.Тихонов ертсе пырать. Вăл вырăнти хăй тытăмлăх органĕсен ĕçченĕсене Хисеп грамотисемпе, Тав хучĕсемпе тата çырăвĕсемпе чысланă.
Муниципаллă служба ĕçченĕсене Вăрмар район пуçлăхĕ - район депутачĕсен Пухăвĕн председателĕ М.Пуклаков та саламланă. Вĕсене муниципаллă службăра нумай çул тÿрĕ кăмăлпа ĕçленĕшĕн район депутачĕсен Пухăвĕн наградисемпе чысланă. Çавăн пекех "Единая Россия" партин Тав çырăвĕсене те тивĕçнĕ. Саламлă сăмахсемпе Вăрмар хула тăрăхĕн администрацийĕн пуçлăхĕ А.Павлов та тухса калаçнă. Вырăнти артистсем уява савăк кăмăл-туйăмпа пуянлатрĕç.
Источник: "Урмарская районная газета"
Первоисточник: А.Чернов.