26 апреля 2017 г.
Апрелĕн 21-мĕшĕнче Вырăнти хăй тытăмлăх кунне халалласа Шупашкарта савăнăçлă мероприяти иртнĕ. Уява район пуçлăхĕ М.Пуклаков тата район администрацийĕн пуçлăхĕ А.Тихонов ертсе пыракан делегаци хутшăннă. Унăн йышне районти хула тата ял тăрăхĕсен пуçлăхĕсем, старостăсем, ветерансем, райадминистраци ĕçченĕсем кĕнĕ. Палăртнă уяв Чăваш патшалăх филармонийĕнче пулнă.
Республикипех пуçтарăннă вырăнти хăйтытăмлăх органĕсен представителĕсене саламланă май ЧР Пуçлăхĕ М.Игнатьев халăхăн пурнăç условийĕсен шайне ÿстерсе пырассишĕн çине тăрса ĕçлекенсене пурне те тав сăмахĕсем каланă, професси уявĕ ĕç кăтартăвĕсене пĕтĕмлетме май панине асăннă. Пуласлăх валли те тĕллевсене палăртса хума питĕ меллĕ тесе каланă. Пĕр-пĕринпе тухăçлă ĕçлесе пынине кура, çитĕнÿсем те сахал мар тенĕ. Калăпăр, РФ Наци рейтингĕнче инвестици илĕртÿлĕхĕн ĕç кăтартăвĕпе Чăваш Республики 85 субъект хушшинче хисеплĕ 6-мĕш вырăнта тăнине пĕлтернĕ.
"Нимĕнле йывăрлăхсем те пире чăрмав кÿреймĕç. Эпир çитĕнекен яш-кĕрĕме аталанса тĕрĕс çул-йĕр шыраса тупма кирлĕ пек условисем йĕркелесе тăратпăр. Кулленех регионта пысăк технологи вăй илсе пырать, çĕнĕрен те çĕнĕ производствăсем хута каяççĕ", - тенĕ М.Игнатьев.
ЧР Пуçлăхĕ М.Игнатьев вырăнти хăй тытăмлăх органĕсенче ĕçлесе хисеплĕ канăва тухнă ветерансене уйрăммăн пысăк тав сăмахĕ каланă. Республика аталанăвне пысăк тÿпе хывнăшăн ырланă. "Влаçри çынсен халăх валли тăрăшмалла. Тавралăха тирпей-илем кÿртессипе çыхăннă ыйтусене çынсемпе пĕрле канашласа кирлĕ пек мерăсем йышăнса хăварни çав тери пĕлтерĕшлĕ", - тенĕ республика Пуçлăхĕ. Паянхи пурнăç таппинче çитĕнекен ăрăва патриотла воспитани парасси тĕп тĕллевсенчен пĕри пулса тăнине каланă вăл сăмаха малалла тăсса.
Чăваш Енри муниципалитет пĕрлешĕвĕсен Канашĕн Правленийĕн председателĕ, Элĕк районĕн администрацийĕн пуçлăхĕ А.Куликов хăйĕн докладĕнче вырăнти хăй тытăмлăх органĕсенче тăрăшакансене тухăçлă ĕçленĕшĕн тав тунă. Вырăнти хăй тытăмлăх органĕсем Чăваш Ен Правительствипе пĕрлехи вăйпа хуласемпе районсене тата та тирпейлĕрех тунине каланă. Ку енĕпе, паллах, федераци, республика тата муниципалитет программисем пысăк пулăшу панине асăннă. Республика Пуçлăхне М.Игнатьева ырласа тав сăмахĕсем каланă.
Чăваш Республикин Патшалăх Канашĕн Председателĕ В.Филимонов хăйĕн сăмахĕнче муниципалитетсенче вăй хуракансем халăхпа çывăхрах тăнине каланă. Çынсем пурнăçра хăйсене мĕнлерех туясси, экономикăна аталантарасси, пурăнма хăтлă майсене малалла лайăхлатасси ытларах чухне шăпах та вĕсенчен нумай килнине каланă вăл.
Вырăнти хăй тытăмлăх органĕсен чи лайăх ĕçченĕсем çак кун патшалăх наградисене тивĕçнĕ. Вĕсем хушшинче Вăрмар район представителĕсем те пулнă. Вырăнти хăй тытăмлăх аталанăвне тÿпе хывнăшăн Энĕшпуç ял тăрăхĕн пуçлăхĕ Олег Анатольевич Иванов ЧР Хисеп грамотине тивĕçнĕ. Çавăн пекех вырăнти хăй тытăмлăхра нумай çул тÿрĕ кăмăлпа ĕçленĕшĕн райадминистрацин тĕп специалист_эксперчĕ Светлана Дмитриевна Хованская ЧР Патшалăх Канашĕн Хисеп грамотине илнĕ.
Источник: "Урмарская районная газета"
Первоисточник: ЧР ПА пресс-служби.