15 апреля 2017 г.
Вăрмарти ачасемпе çамрăксен пултарулăх çуртĕнче "Чĕрĕ сăмах" /"Живое слово"/ конкурсăн район шайĕнчи тапхăрĕ иртрĕ. Конкурсра проза произведенийĕсене пăхмасăр чăвашла каламалла пулчĕ. Район шкулĕсенче чăваш чĕлхипе литературине вĕрентекенсемпе вĕренекенсем пуçтарăнчĕç. Пурĕ районти пĕтĕмĕшле пĕлÿ паракан 11 шкултан 16 вĕренекен хутшăнчĕ.
Чăваш чĕлхипе тап-таса калаçакан хĕр ачасемпе арçын ачасем хавхалану туйăмĕ çуратаççĕ. Чăваш литературинчи чи паллă проза произведенийĕсене кашниех ăсран интонаципе тăрăшса каларĕ. Жюри членĕсем вĕсене тимлĕ итлерĕç. Ачасен пултарулăхне, тăрăшулăхне хак пама çăмăлах та пулмарĕ. Çапах та чи пултаруллисем çав-çавах та ыттисенчен палăрчĕç. Çав тери чуна пырса тивмелле, чăн-чăн артистсем пекех пулчĕç вĕсем. 5-6 класра вĕренекенсем хушшинче пĕрремĕш вырăна Чупайĕнчи 6-мĕш класра вĕренекен Анна Иванова тивĕçрĕ /руководителĕ Л.Цыфаркина/. 7-8 класра вĕренекенсем хушшинче Энĕшпуçĕнчи 7-мĕш класра вĕренекен Арина Фролова пĕрремĕш пулчĕ /руководителĕ З.Дмитриева/. 9-10-мĕш класра вĕренекен ачасем хушшинче Чупайĕнчи 9-мĕш класра вĕренекен Никита Никифоров /руководителĕ Л.Цыфаркина/ тата Вăрмарти Г.Е.Егоров ячĕллĕ вăтам шкулти 10-мĕш класра вĕренекен Анастасия Авакова пĕрремĕш вырăна пайларĕç. Çывăх вăхăтра çĕнтерÿçĕсем "Чĕрĕ сăмах" конкурсăн республикăри тапхăрне хутшăнĕç.
Источник: "Урмарская районная газета"
Первоисточник: К.Пудрикова, Вaрмарти ачасен пултарулaх cурчeн директорe.