08 апреля 2017 г.
Республикăри "Сывлăх маршĕ" акци шайĕнче Пысăк Енккасси ялĕн библиотекинче "Спорт - пирĕн юлташ" спорт сехечĕ иртнĕ. Кунта спорта юратакан шкул ачисем пуçтарăннă. Библиотекарь ачасене акци çинчен каласа кăтартнă, унтан мероприятие хутшăнакансем хушшинче "Эпир сывă пурнăç йĕркишĕн" викторина ирттернĕ. А.Хованскийăн "Олимп çулĕ такăр мар" кĕнекипе паллаштарнă. Ку кĕнеке Вăрмар районĕн спорт энциклопедийĕ.
Николай Павлович Михайлов спорт ветеранĕ, çăмăл атлет, мероприятин хисеплĕ хăни пулнă. Вăл ачасене хăйĕн пурнăçĕ, спортри çитĕнĕвĕсем çинчен каласа панă. Н.Михайлов ачасене яланах сывă пурнăç йĕркине пăхăнса пурăнма, спортпа туслă, шкулта ăнăçуллă пулма чĕнсе каланă. Ун хыççăн шкул ачисем спортсменпа пĕрле "Сывă пулма вăхăт!" ятпа зарядка тунă. Мероприяти ачасемшĕн усăллă пуласса, вĕсем спорт пирĕн пурнăçра пысăк вырăн йышăннине, сывлăх чи хаклă пулнине ăнланасса шанатпăр. Кунашкал мероприятиех çак кун районти ача-пăча библиотекинче те иртрĕ.
Источник: "Урмарская районная газета"
Первоисточник: Н.Никонорова, библиотека заведующийe.