08 апреля 2017 г.
"Хĕрлĕ ялав" хаçата 2017 çулăн иккĕмĕш çурринче илсе тăмашкăн çырăнтару тапхăрĕ малалла пырать. Районта пурăнакансем "Хĕрлĕ ялава" кăçалхи апрелĕн 1-мĕшĕнчен 441 тенкĕ те 6 пуспа çырăнма пултараççĕ. Почта çыхăнăвĕ хаçата вулакан патне илсе çитернĕшĕн хаксене ÿстерессине малтанах пĕлтернĕччĕ. Хаксене редакци, шел те витĕм кÿреймест. Епле пулсан та хаклă вулаканăмăрсем, пирĕнпе çыхăнăва татмасса шанас килет. 2017 çулхи пĕрремĕш çур çуллăхра район хыпарçине çырăнса илессипе активлăхпа палăртăр. Ял тăрăхĕсенчи почта уйрăмĕсен начальникĕсемпе вĕсенче ĕçлекен почтальонсем пысăк тăрăшулăхпа палăрчĕç. Уйрăмах Чупай, Кавал, Энĕшпуç, Аслă Чак, Вăтакас почта çыхăнăвĕн уйрăмĕсенче вăй хуракансен пултарулăхне палăртса хăвармалла. Эппин эпир сирĕнпе тăрăшса ĕçлени сая каймарĕ - хаçат тиражне сыхласа хăвартăмăр. Çакă чи - пахи. Апла пулсан пирĕн журналистсем ахальтен мар вулакан кăмăлне тупас тесе чылай интервьюсем, статьясем, тĕрлĕ заметкăсем çырнă. Республика тулашĕнче пурăнакан ентешĕмĕрсем те кăмăла çĕклерĕç. Хальхи вăхăтра район хыпарçине Мурманскри чăвашсем те хапăлласах вулаççĕ. Вулаççĕ çеç те мар, пирĕнпе тачă çыхăну тытсах тăраççĕ, хăйсен ĕçĕ-хĕлĕ çинчен пĕлтерсех тăраççĕ. Эпир вара вĕсен пурнăçĕпе ĕç-хĕлне "Хĕрлĕ ялав" хаçатра çутататпăр.
Район хаçачĕпе предприятисемпе организацисем, хресчен ?фермер% хуçалăхĕсем, уйрăм çын предпринимательсем те туслă çыхăну тытаççĕ.Сăмахран, Вăрмар райповĕ, "АККОНД" акционерсен обществи, "Вăрмарти механика завочĕ" акционерсен уçă обществи, "Светлана", "ОВАС" тулли мар яваплă обществăсем, "Урмарытеплосеть" муниципалитетăн унитарлă предприятийĕ, "Выльăх-чĕрлĕх чирĕсемпе кĕрешекен Вăрмарти станци" патшалăх ветеринари служби, Вăрмаргаз участокĕ кашни çырăнтару кампанийĕнчех хăйсен ĕççыннисене "Хĕрлĕ ялав" хаçат çырăнса параççĕ. Унсăр пуçне Г.Ямуков, Н.Иванов, В.Иванов, В.Ванюков хресчен ?фермер% хуçалăхĕсен пуçлăхĕсем, "Вăтам Энĕш" /пуçлăхĕ П.Крылов/ тулли мар яваплă общество тата ыттисем те район хыпарçине социаллă хÿтлĕх кирлĕ çынсем валли парне тăваççĕ.
Кашни çырăнтару кампанийĕ вĕçленсенех хамăрăн хаçат тусĕсемпе лотерея вылявĕ ирттересси йăлана кĕчĕ. Ун валли парнесемпе тивĕçтерессипе "Вăрмарти тырă йышăнакан предприяти" /пуçлăхĕ В.Александров/, "Мой дом" /пуçлăхĕ В.Енькова/, "Лидер", "Татьяна" суту-илÿ центрĕсем,"Уют" тулли мар яваплă общество тата ытти чылай уйрăм çын предпринимательсем спонсорла пулăшу кÿреççĕ. Пире пулăшса пыракансене Турă малалла та ăнăçлă ĕçлеме вăй-хăват парсах пытăр.
Хисеплĕ вулаканăмăрсем! Район хаçачĕпе малашне те эсир çыхăнăва çирĕплетсе пырасса шанас килет. Ваттисем çапла каланă: "Ырлăхра та, хурлăхра та пĕрле пуласчĕ". Туслăх шăпах çакăн пек самантсенче туптанать те ĕнтĕ. Пĕрле пулсан эпир темĕнле йывăрлăха та парăнтарма пултаратпăр. Çавăнпа та пурне те 2017 çулхи иккĕмĕш çур çуллăха "Хĕрлĕ ялав" хаçата çырăнса илме чĕнсе калатпăр. Пирĕн хаçата çитес çур çуллăха почта çыхăнăвĕн уйрăмĕсемсĕр пуçне "Чувашпечать" киоскĕнче - 360 тенкĕпе, альтернативлă майпа 250 тенкĕпе редакцирен çырăнма пулать. Пурнăç таппинчен ан юлăр, район хыпарçипе пĕрле пулăр!
Источник: "Урмарская районная газета"
Первоисточник: З.ПАВЛОВА.