05 апреля 2017 г.
"Чăваш Республикин Министрсен Кабинечĕ умне вырăнти хăйтытăмлăх органĕсемпе пĕрле культурăн çĕнĕ объекчĕсене тăвас ĕçе малалла тăсма тата Чăваш автономие туса хунăранпа 100 çул çитнĕ тĕле Чăваш Енĕн ял çĕрĕнчи районĕсенче культурăпа кану учрежденийĕсене юсас ĕçе вĕçлеме тĕллев лартатăп", - тенĕ ЧР Пуçлăхĕ М.Игнатьев Патшалăх Канашне янă Çырăвĕнче.
Çавна май кăçал республикăра тата тепĕр 4 культура çурчĕ туса хута яма, 31-шне юсама, 25 клуба вара хальхи оборудованипе тивĕçтерме палăртнă. Хальхи вăхăтра вĕсенчен пĕринче, Энĕшпуçĕнчи Культура вучахне хута ярассипе ĕçсем кал-кал пулса пыраççĕ. Кунти строительство ĕçĕсемпе тĕплĕнрех паллашма иртнĕ кунсенче пирĕн района ЧР Культура, национальноç ĕçĕсемпе архив ĕçĕн министрĕн заместителĕ А.Тимофеев килсе çитнĕ. Вăрмар район администрацийĕн пуçлăхĕ А.Тихонов, Энĕшпуç ял тăрăхĕн пуçлăхĕ О.Иванов 150 çын вырнаçмалăх хăпартнă культура çурчĕн строительстви мĕнлерех шайра пулса пыни пирки паллаштарчĕç. Унăн подрядчикĕ - "Урмарская" коллективлă строительство организацийĕ" акционерсен хупă обществи. Хальхи вăхăтра кунта шалти отделка ĕçĕсем пыраççĕ. Асăннă организацинче тăрăшса вăй хуракансем урайне плитка сараççĕ, стенасене шал енчен гипсокартонпа хуплаççĕ. Ку енĕпе пурĕ 8 рабочи тăрăшса вăй хурать. Строительсем ĕçе графикпе вăхăтра пурнăçласа пыраççĕ.
"Кунта пысăк калăпăшлă ĕçсене пурнăçланă. Подрядчик хăй çине илнĕ обязательствăна пĕтĕмпех пурнăçласа пырать. Пире хальхи вăхăтпа килĕшсе тăракан пахалăхлă культура çурчĕ кирлĕ", - терĕ Анатолий Валерьевич. "Урмарская" коллективлă строительство организацийĕ" акционерсен хупă обществин генеральнăй директорĕ Н.Зайцев ку енĕпе тăрăшса вăй хунине, культура çурчĕн строительство ĕçĕсене палăртнă графикпе пурнăçласа пынине, ăна Республика кунĕ тĕлне хута яма палăртнине каларĕ.
Источник: "Урмарская районная газета"
Первоисточник: Н.ШИШКИНА.