01 апреля 2017 г.
Çанталăк кунсерен ăшăтса та ăшăтса пырать. Кĕçех çĕр пиçсе çитсе ака-суха ĕçĕсем пуçланĕç. Районта çурхи ĕçсен тапхăрне хатĕрленесси еплерех пынипе райадминистрацин ялхуçалăхĕпе экологи пайĕн начальникне Н.НИКОЛАЕВА паллаштарма ыйтрăмăр.
- Кăçал çурхи культурăсене миçе гектар çинче акса-лартма палăртнă?
- Пĕтĕмĕшле илсен - 14969 гектар çинче, çав шутран çурхи пĕрчĕллĕ тата пăрçа йышши культурăсене 12453 гектар, çĕрулмипе пахча-çимĕçе 638 гектар çинче, хĕвелçаврăнăшпа горчицăна 1138 гектар, выльăх апачлĕх культурăсене 5285 гектар çинче акма палăртнă. Унсăр пуçне кĕрхи пĕрчĕллĕ культурăсене 4701 гектар акса хăварнă. Çапла вара акнă лаптăксем пĕтĕмпе 24200 гектар йышăнĕç, пĕлтĕрхипе танлаштарсан çакă 102 процент пулать.
- Вăрлăх хатĕрлессипе районта кăçал мĕнлерех ĕçленипе паллаштараймăр-ши?
- Кăçал районта мĕнпур йышши хуçалăхсене илес пулсан вăрлăх хатĕрлессипе аван ĕçленине палăртмалла. 2751 тонна çурхи пĕрчĕллĕ культурăсенчен 2431 тонни кондицие ларнă. Çак ĕçе çур аки пуçланиччен пĕтĕмпех вĕçлеме тĕллев лартнă. "Мĕн акатăн - çавă шăтать", - текен каларăша тĕпе хурса ĕçлетпĕр. Паха вăрлăхран тухăçĕ те аван тухĕ. Пĕтĕмĕшле илсен çуркунне акса хăварма пурĕ 200 тонна элитлă, 9 тонна супер элитлă пĕрчĕллĕ культурăсен вăрлăхне, 60 тонна çĕрулмин элитлă вăрлăхне туяннă. Кукурузăн элитлă вăрлăхне те туянасшăн. Пĕтĕмĕшле илсен кăçал акса хăварма вăрлăх çителĕклĕ.
- Минераллă удобренисемпе сĕрмелли-çунтармалли материалсем çителĕклĕ хатĕрленĕ-и?
- Районти чылай хуçалăхсем ку енĕпе кĕрхи культурăсене пухса кĕртсенех ĕçлеме тытăннă темелле. Çур акинче пĕтĕмпе 1037 тонна минераллă удобрени кирлĕ пулсан, паянхи куна 494 тонни пур, çакă планпа пăхнинчен 48 процента яхăн. Вĕсемпе ытларах тĕш-тырăпа пăрçа йышшши культурăсене, çĕрулмипе пахча-çимĕçе апатлантарма палăртнă. Хуçалăхсем паян тесен паян çур акине тухма хатĕр.
- Николай Михайлович, калăр-ха районта пурĕ ялхуçалăх енĕпе ĕçлекен миçе хуçалăх тата вĕсенче механизаторсемпе ытти специалистсем çителĕклĕ-и?
- Районта 11 ялхуçалăх предприятийĕ ĕçлет, кăçал тепĕр хуçалăх хутшăнчĕ, хресчен ?фермер/ хуçалăхĕ - 62, вĕсенчен 6-шĕ кăçал ĕçлеме тытăнчĕ, 10228 уйрăм хушма хуçалăх вăй хурать. Хальхи вăхăтра хуçалăхсенче хĕрÿ тапхăр пырать. Вĕсем пурте ялхуçалăх техникине çуракине тухма хатĕрлеççĕ. Пĕтĕмĕшле илсен юсав ĕçĕсем вĕçленсе пыраççĕ темелле. Вĕсем паянхи ĕçе ырана хăвармасăр тăрăшаççĕ. Апрелĕн 1-мĕшĕ тĕлне 117 трактортан 106-шĕ, 84 автомашинăран 77-шĕ юсавлине палăртма кăмăллă. Юсавлă сеялкăсемпе плугсене кăкармалла та ĕçе тухмалла. Кашни кун тухăçлă ĕçлесен çитĕнÿсем пуласса шанма пулать. Ăнăçу сире, ялхуçалăх ĕçченĕсем.
Ÿкерчĕк çинче: «Иванов В.А.» хресчен /фермер/ хуçалăхĕнче хальхи вăхăтра тăрăшсах çур акине хатĕрленеççĕ. Ялхуçалăх техникисене техосмотр кăларассишĕн кашни агрегат умĕнчех механизаторсем ĕçлеççĕ. Акă, А.Артемьевпа В.Григорьев механизаторсем кăкарса ĕçлемелли агрегатăн юлашки юсав ĕçĕсене вĕçлессишĕн тăрăшаççĕ.
Источник: "Урмарская районная газета"
Первоисточник: А.НИКОЛАЕВА калаcнa.