29 марта 2017 г.
Мартăн 18-мĕшĕнче Чăваш Республикин Пуçлăхĕ М.Игнатьев Мурманск облаçĕн кĕпĕрнаттăрĕн пĕрремĕш заместителĕпе А.Тюкавинпа ĕçлĕ тĕлпулу ирттернĕ. Унта ЧР Культура, национальноçсен ĕçĕсен тата архив ĕçĕн министрĕ К.Яковлев та пулнă.
Тĕлпулăва хутшăннисем регионсен социаллă-экономикăллă аталанăвĕ çинчен тата малашлăхра пĕрле туслăн ĕçлессине сÿтсе явнă. Тĕлпулура икĕ ен пуçлăхĕсем суту-илÿ, культура пайĕнче тачă çыхăнса ĕçлемелли ĕç хутне алă пусса çирĕплетнĕ. Килĕшÿ туни икĕ регион хушшинчи ĕçлĕ çыхăнăва татах та анлăлатма пулăшнине палăртнă яваплă çынсем.
Аса илтеретпĕр: Чăваш Республикин Пуçлăхĕ М.Игнатьев йĕркелесе ертсе пынă сумлă делегаци мартăн 17-18-мĕшĕсенче Мурманск облаçĕнче пулнă. Делегаци йышĕнче Чăваш Республикин Министрсен кабинечĕн председателĕн заместителĕ - экономика аталанăвĕн, промышленноç тата суту-илÿ министрĕ В.Аврелькин, ЧР Культура, национальноçсен ĕçĕсен тата архив ĕçĕн министрĕ К.Яковлев тата ыттисем те хутшăннă.
Мурманск облаçĕнчи пĕрремĕш кунĕнче Чăваш Енĕн творчествăллă коллективĕсем: «Ярды» тата «Дуняша Style» фольклор ушкăнĕсем /руководителĕ ЧР халăх артисчĕ А.Уляндина/ Тăван çĕршыв хÿтĕлевçисене - çар службинче хăйсен тивĕçне пурнăçлакансене тата контракт мелĕпе службăра тăракансене профессиллĕ уявпа - подводник-моряксен Кунĕ ячĕпе саламланă. ЧР Культура, национальноçсен ĕçĕсен тата архив ĕçĕн министрĕ К.Яковлев Мурманск облаçĕнчи культурăпа искусство комитечĕн председателĕпе С.Ершовпа тĕл пулнă вăхăтра икĕ регион пĕрремĕш çул кăна мар туслă пулнине тата малашне те пĕр-пĕринпе çыхăну тытса театр учрежденийĕсем хăйсен пултарулăхне кăтартасса шаннине пĕлтернĕ. Мурманск облаçĕнчи творчествăлла коллектива Чăваш Енре кăçалхи июньте иртекен Республика кунне тата Пĕтĕм тĕнчере иртекен «Раççей çăлкуçĕсем» халăх пултарулăхĕн юбилейлă XXV фестивальне хутшăнма чĕнсе каланă. Икĕ регион пĕр-пĕринпе килĕшсе ĕçлеме калаçса талса алă пусса çирĕплетни малашлăха çĕнĕ варкăш кĕртнине палăртрĕ. Çакăн пек тĕл пулусем халăхсен хушшинчи туслăх çыхăнăвне тата чăваш наци культурине, тăван чĕлхене упраса хăварма пулăшать тата Мурманск облаçĕнчи чăваш диаспорин наци культурине аталантарать. Савăнăçлă самантра Мурманскри ентешсене Чăваш Енри Культура, национальноçсен ĕçĕсен тата архив ĕçĕн министрĕ К.Яковлев Хисеп грамотисем парса хавхалантарчĕ. Чăваш Республикинчен килнĕ сумлă делегаци халăхсен хушшинчи Çурçĕр праçникне 83-мĕш хут уçнă çĕре те хутшăнчĕç.
Чăваш Енĕн чаплă хăнисем çавăн пекех Мурманск облаçĕн Çурçĕр флочĕн тĕп базине те çитсе курчĕç. Çурçĕр флочĕн Кольский флочĕн ертсе пыракан командирĕн заместителĕ А.Пашков Чăваш Енрен килнисене чăн-чăн тава тивĕçлĕ моряксем тесе мухтанă. Паянхи куна илсен кунта 100 ытла салтак çар ретĕнче тăнине пĕлтернĕ. Кунта «Ядрин» çар карапĕ те пурри çинчен чарăнса тăнă. Полярныйĕнче М.Игнатьев «Ядрин» тральщик çинче службăра тăракансемпе тĕл пулнă. Çак карапа 16 çул хушши ĕнтĕ Етĕрне хула администрацийĕ шефа илсе пулăшса пынине те палăртса хăварма кăмăллă. Хальхи вăхăтра тральщик çинче контракт мелĕпе Чăваш Енрен икĕ çамрăк службăра тăраççĕ: пĕри - Патăрьел районĕнчи А.Колосов матрос, тепри Етĕрне районĕнчи С.Трофимов старшина. «Экипаж çине Чăваш Республикин сумлă çыннисем килсе кайни пирĕншĕн питех те пĕлтерĕшлĕ, пире татах та вăйлăрах ĕçлеме вăй-хăват хушать. Чи хакли вара атте-аннесем каланă пиле видеосюжетпа пирĕн пата илсе çитерни пулчĕ.Тăван çĕрпе çыхăну тытни пирĕншĕн усăсăр сăмахсем мар», - теççĕ ентешсем. Çакăн пек тĕлпулусем Тăван çĕршыв хÿтĕлевçисен пĕлтерĕшне те самаях ÿстерет. Ахальтен мар ĕнтĕ Чăваш Республикин Пуçлăхĕ «Чăваш Республикин Правительстви малашне те çар ретĕнче тăракан салтаксемпе тачă çыхăнма хатĕр», - терĕ. Çак сăмахсем çамрăксене патриотла воспитани парас ĕçре те пысăк витĕм кÿреççĕ, чăваш наци культурине те çÿллĕ шая çĕклеççĕ, тăван çĕртен аякри чăвашсене те пур енлĕн хавхалантараççĕ.
В.ГАВРИЛОВ,
Мурманскри регионсенчи обществăлла организаци пĕрлешĕвĕн
председателĕ, экономика наукисен кандидачĕ.
/Пирĕн ентеш - Пысăк Енккасси ялĕ/.
Источник: "Урмарская районная газета"