Публикации » Агрокласс уçăлни - малашлăх шанчăклăхĕ

22 марта 2017 г.

Çурхи хĕвел ăшшине хĕрхенмест. Кĕçех çуракине тухма вăхăт çитет. Хресчен ?фермер% хуçалăхĕсенче хальхи вăхăтри çĕнĕ йышши техника туянса унпа ĕçлеме компьютера лайăх пĕлекен механизаторсем кирлĕ. Унсăр пуçне фермăсенче те ĕç-пуçсем çак мелсемпех пыраççĕ. Ялта ĕçлесе пурăнма пысăк квалификациллĕ инженерсемпе агрономсем, зоотехниксемпе ветеринарсем кирлĕ. Ахальтен мар ĕнтĕ Чăваш Ен Пуçлăхĕ М.Игнатьев ЧР Патшалăх Канашне янă Çырăвĕнче ялхуçалăх валли кадрсем хатĕрлессине тимлĕх уйăрмалли çинчен палăртса хăварнă. Çавна май пирĕн республикăри ялхуçалăх министерстви тĕрлĕ майсем шыраса кадрсем хатĕрлессипе тăрăшать.

Чăваш Енри районсенчи шкулсенче 2016 çултанпа агроклассем йĕркелеме тытăннă. Вĕсене республикăри ялхуçалăх академийĕн никĕсĕ çинче йĕркелеççĕ. Иртнĕ çулхи ноябрĕн 19-мĕшĕнче вăл пуçласа Красноармейски районĕнчи Трак шкулĕнче ĕçлеме тытăннă, унтан Шупашкар, Çĕрпÿ, Патăрьел районĕсенчи шкулсенче ачасене çак енĕпе вĕрентме пуçланă. Кăçалхи мартăн 17-мĕшĕнче вара агрокласа пирĕн районти Г.Е.Егоров ячĕллĕ Вăрмарти пĕтĕмĕшле пĕлÿ паракан вăтам шкулта савăнăçлă лару-тăрура уçрĕç. Унта Чăваш Республикин ялхуçалăх министрĕн заместителĕ М.Загребаева,Чăваш Республикин вĕрентÿ тата çамрăксен политикин наукăпа профессиллĕ вĕренÿ пайĕн начальникĕ А.Атамов, ялхуçалăх академийĕн ректорĕ А.Макушев, çак академийĕн методика тата вĕрентÿ енĕпе ĕçлекен проректорĕ Л.Корнилова, райадминистрацин ялхуçалăхĕпе экологи пайĕн начальникĕ Н.Николаев, райадминистрацин вĕрентÿпе çамрăксен политики тата спорт управленийĕн начальникĕ Ю.Соколов хутшăннă. Хисеплĕ хăнасем ачасем умĕнче тухса калаçса çак проект пурнăçра питех те усăллă пуласси пирки тата шкул сакки çинчен тÿрех харпăр хăйне килĕшекен професси суйласа илсе ялхуçалăх академийĕн алăкне хăюллăнах уçма май парасси çинчен каларĕç. Асăннă шкул директорне П.Алексеева ялхуçалăх академийĕн ректорĕ А.Макушев тĕрлĕ тĕслĕ принтер парнелерĕ. Агрокласа пирĕн районта уçма май килнишĕн хисеплĕ хăнасене шкул директорĕ П.Алексеев ачасемпе ашшĕ-амăшĕсем тата вĕрентекенсен ячĕпе чĕререн тав турĕ, малашне пĕрле ĕçлессине шансах тăрассине, агрокласс уçăлни малашлăх шанчăклăхĕ пулнине палăртрĕ. 

Источник: "Урмарская районная газета"

Первоисточник: А.НИКОЛАЕВА.