22 марта 2017 г.
Яллă вырăнта е хула майлă поселоксенче ĕçлекен аслă е вăтам медицина пĕлĕвне илнĕ медицина ĕçченĕсене çурт-йĕр хăпартма çĕр участокĕ е пурăнмалли çурт-йĕр туяннăшăн кредитăн процент ставкин пайне компенсацилемеллине ятарлă нормăпа право акчĕпе çирĕплетнĕ.
Чăваш Республикинче çакăн пек документ вăл ЧР Пуçлăхĕн "Чăваш Республикинчи яллă вырăнсенчи сывлăх сыхлавĕн учрежденийĕсене медицина кадрĕсемпе тивĕçтермелли мерăсем çинчен" 2012 çулхи февралĕн 13-мĕшĕнчи 24 номерлĕ Хушăвĕ. Çак Хушупа килĕшÿллĕн пурăнмалли çурт-йĕр туянма е хăпартма илнĕ ипотека кредичĕн пĕр пайне тÿлеме субсиди пама палăртнă. Анчах та социаллă пулăшупа усă курмашкăн ятарлă условисене пăхăнмалла. Тĕп условисенчен пĕри - вырăнти хăйтытăмлăх органĕнче пурăнмалли çурт-йĕр кирлĕ тесе учета тăмалла.
Чăваш Республикинче медицина ĕçченĕсене ялта ĕçлеме илĕртес тĕллевпе çавăн пекех "2014-2017 çулсенче тата 2020 çулчченхи тапхăрта ял территорийĕсене çирĕппĕн аталантарасси çинчен" программа шайĕнче çурт-йĕр туянма е хăпартма субсиди уйăраççĕ. Республикăра çак программăпа 2016 çулта 12 медицина ĕçченĕ усă курнă.
Иртнĕ çул пирĕн районта "Земство тухтăрĕ" программăпа килĕшÿллĕн 3 врач ĕçлеме пуçланă. Вĕсен шутĕнче рентгенолог, окулист, гинеколог. Кăçал вара врач-педиатр. Вăрмарти тĕп больницăра "Земство тухтăрĕ" программăпа 2016 çулхи март уйăхĕнчен пуçласа Александра Сергеевна Тихонова врач ĕçлет. Хăй вăл Чулхула облаçĕнчен. 2008 çулта Шупашкарти И.Н.Ульянов ячĕллĕ Чăваш патшалăх университечĕн "Лечебное дело" факультетне вĕренсе пĕтернĕ. Халĕ вăл район больницинче лучевой диагностика уйрăмĕн заведующийĕ, пĕр вăхăтрах рентгенолог-врач тата ультразвук диагностикин врачĕ те. Мăшăрĕ те унăн медик. Анатолий Шупашкарта васкавлă пулăшу уйрăмĕнче фельдшер пулса ĕçлет. Пурăнасса вĕсем Вăрмар поселокĕнчех пурăнаççĕ. Хĕрпе ывăл - Татьянăпа Иван - çитĕнтереççĕ. "Земство тухтăрĕ" программа шайĕнче илнĕ пулăшупа - 1 миллион тенкĕпе усă курса Александра Сергеевна хваттер туянма илнĕ ипотека кредитне тÿленĕ. Патшалăх пулăшăвĕпе усă курма май килнĕшĕн, программăна хутшăннăшăн савăнать çамрăк тухтăр.
Источник: "Урмарская районная газета"
Первоисточник: Э.Михайлова.