15 марта 2017 г.
Мартăн 11-мĕшĕнче Çĕнĕ Кинчер шкулĕнче Афганистанра интернационалла тивĕçе пурнăçласа пуçне хунă Рудольф Петров ентеше асăнса йĕлтĕрçĕсен ăмăртăвĕ иртрĕ. Кăçал йăлана кĕнĕ ăмăртăва ирттерме пуçланăранпа 12 çул çитрĕ. Çулсерен уяв спортпа туслă çынсене, паттăр салтакпа пĕрле вĕреннисене, ял халăхне пуçтарать.
Ăмăртăва Вăрмар, Пинер, Кĕлкеш, Чупай, Энĕшпуç, Пысăк Енккасси, Чулкас, Аслă Чак шкулĕсенчен килнĕ командăсем хутшăнчĕç. Ытти район шкулĕсенчен те /Куславкка районĕнчи Тĕрлемес, Шупашкар хулинчи 61-мĕш номерлĕ шкултан/ килнĕ спортсменсем. Çитĕннисем хушшинче те тĕрлĕ район, ял, хула çыннисем пулчĕç.
Ăмăртăва хутшăнакансене Вăрмар район администрацийĕн пуçлăхĕ А.Тихонов, Пинер ял тăрăхĕн пуçлăхĕ В.Шуйский, «Афганистан ветеранĕсен Пĕтĕм Раççейри союзĕ» организацин Чăваш Республикинчи председателĕ И.Кашаев, райадминистрацин пуçлăхĕн заместителĕ - организаципе контроль ĕçĕсен пайĕн начальникĕ Н.Павлов, Çĕнĕ Кинчерти пĕтĕмĕшле пĕлÿ паракан тĕп шкул директорĕ В.Андреев, педагогика ĕçĕн ветеранĕ А.Ананьев саламларĕç, ăнăçу сунчĕç. Рудольф Петрова хисеп туса уçнă Асăну хăми умне шкул ачисем чăрăш лăссисенчен хатĕрленĕ гирлянда хучĕç. Раççей тата Чăваш Республикин ялавĕсене çĕкленĕ хыççăн ăмăрту пуçланчĕ. Чи малтан старта шкул çулне çитмен йĕлтĕрçĕсем тухса кайрĕç. Вĕсем хыççăн шкул ачисен тупăшăвĕ пуçланчĕ. Энĕшпуç, Тĕрлемес, Кĕлкеш, Пинер, Шупашкар, Аслă Чак, Чупай, Çĕнĕ Кинчер шкулĕсенчи спортсменсем мала тухрĕç. Çитĕннисенчен мала тухакансем Чупай, Энĕшпуç, Çĕнĕ Кинчер, Уйкас, Кивĕ Вăрмар, Вăрманкас, Мăнçырма ялĕсенчен, Вăрмар поселокĕнчен, Куславкка, Шупашкар хулинчен, Куславкка районĕнчи Кунер, Тĕрлемес ялĕсенчен, Тăвай районĕнчи Тăрмăш ялĕнчен пулчĕç. Ăмăртăва пĕтĕмлетсе мала тухнă йĕлтĕрçĕсене парнесемпе медальсем, грамотăсем парса чысларĕç. Спортсменсене саламланă çĕре район администрацийĕн вĕрентÿпе çамрăксен политикин тата спорт управленийĕн начальникĕ Ю.Соколов, «Вăтам Энĕш» тулли мар яваплă обществăн генеральнăй директорĕ П.Крылов, «Афганистан ветеранĕсен Пĕтĕм Раççейри союзĕ» организацин Чăваш Республикинчи председателĕ И.Кашаев хутшăнчĕç. Ăмăрту ирттерме апат-çимĕçпе тата парнесемпе «Вăтам Энĕш» тулли мар яваплă обществăн генеральнăй директорĕ П.Крылов, тав хучĕсемпе, медальсемпе вара «Афганистан ветеранĕсен Пĕтĕм Раççейри союзĕ» организацин Чăваш Республикинчи председателĕ И.Кашаев тивĕçтернĕ. Турнир районти 2016-2017 çулхи хĕллехи спорт сезонне вĕçлерĕ.
Источник: "Урмарская районная газета"
Первоисточник: И.КРАСНОВА, вeрентекен.