04 марта 2017 г.
Пурнăçра ачасене мĕн кирлине пĕчĕкрен хăнăхтарса ÿстермеллине кашни ашшĕ-амăшĕ, ача-пăча садикĕсенче тата шкулсенче вĕрентекенсем пурте ăнланаççĕ.
Çавна май вĕсемпе ачаранах тĕрлĕрен мероприятисем ирттеретпĕр, çарпа патриотизмла воспитани парассипе те сахал мар вăй хуратпăр. Çапла пулмасăр, пĕчĕкле вĕрентсен пуçа та лайăхрах кĕрсе юлать. Нумай çул ача садĕнче ĕçленĕ май çакна эпир лайăх ăнланса çитнĕ. Çулталăкăн кашни уяв кунĕсенче тата хамăр палăртнă план-мероприяти тăрăх тĕрлĕрен конкурссемпе вăйăсем, уяв ирттеретпĕр. Акă, кăçал та Тăван çĕршыв хÿтĕлевçин кунĕ ячĕпе ачасен ашшĕсемпе, аслашшĕ-кукашшĕсемпе "Березка" ача садĕнчи "Земляничка" ушкăнĕнче савăнăçлă уяв ирттертĕмĕр.
Музыка залĕнчи илемлĕ кĕвĕ çеммипе моряк тумне тăхăннă ачасем утса кĕчĕç. Савăнăçлă хăйсем. Пĕри сăвă калать, тепри юрлать, виççĕмĕшĕсем ташлаççĕ... çапла вара ачасем пĕрин хыççăн тепри хăйсен пултарулăхне кăтартрĕç. Курса ларакан хăнасем вĕсене тăвăллăн алă çупса хавхалантарчĕç. Тен, хăшĕсем хăйсен ачисем çакăн пек пултаруллине килĕсенче сисмен те. Чăннипех те савăнчĕç пурте. Савăнмасăр, сăввисемпе юррисем, ташшисем пурте вĕсене халалланисем пулчĕç-çке! Уявра тĕрлĕрен конкурссем те, вăйăсем те пулчĕç. Акă, ашшĕсем - А.Хованский, Р.Александровский, В.Волков, Ю.Алексеев "Тĕл пер!" вăйăра активлăх кăтартрĕç. Ку вăйăра ашшĕсем, аслашшĕ-кукашшĕсем, мăнукĕсем хастар пулчĕç. Шкул çулне çитмен ачасем аслисене савăнăç кÿни хăй пĕр пысăк телей пулчĕ.
Источник: "Урмарская районная газета"
Первоисточник: Е.ЛУКИНА, С.ЛЕВИНА, воспитательсем.