04 марта 2017 г.
Мартăн 3-мĕшĕнче районти Культурăпа кану çуртĕнче "Ачалăх ячĕпе, ачалăхшăн" ыркăмăллăх марафонĕ старт илчĕ. Марафона пуçарса яраканĕ тата йĕркелекенĕ "Раççейри ача-пăча фончĕн" Чăваш Енри уйрăмĕ. Республикăра вăл 20 çула яхăн иртет. Çак ыркăмăллăх марафонĕ Вăрмар районĕнче те кашни çулах активлă иртет.
Вăрмар районĕнчи ачасен шăпишĕн пăшăрханакан район çыннисем, предприятисемпе организацисенче, учрежденисенче ĕçлекенсем иртнĕ çул 199 пин тенкĕ ытла пуçтарнă. Пухăннă укçа-тенкĕпе йывăр пурнăç условийĕсене кĕрсе ÿкнĕ, нумай ачаллă, сахал тупăшлă çемьесенче пурăнакан ачасене пулăшма, çав вăхăтрах пултаруллă вĕренекенсене аталантарма, социаллă учрежденисенчи пурлăхпа техника базине пуянлатма усă курнă.
Чи малтанах район администрацийĕн пуçлăхĕ, "Ачалăх ячĕпе, ачалăхшăн" марафонăн районти йĕркелÿ комитечĕн председателĕ А.Тихонов сăмах илчĕ. Республикăра кăçал "Ачалăх ячĕпе, ачалăхшăн" ыркăмăллăх марафонĕ февралĕн 15-мĕшĕнче Комсомольски районĕнче старт илни çинчен каларĕ вăл. Савăнăçлă мероприятие Чăваш Ен Пуçлăхĕ М.Игнатьев та хутшăннă. Вăл марафонăн йĕркелÿ комитечĕн председателĕ. Александр Иванович ачасене мĕн пĕчĕкрен тĕрĕс воспитани парса çитĕнтерессишĕн тăрăшса ĕçлемелли пирки, марафонра пухăннă укçа-тенкĕ хамăрăн район ачисемшĕнех тăкакланни çинчен пĕлтерчĕ. Кăçал та пурне те ыркăмăллăх акцине активлă хутшăнма чĕнсе каларĕ. Марафон пухмачне вăл чи малтан район администрацийĕн ĕçченĕсен пĕр кунхи ĕç укçине пухнă конверта ячĕ, районта "Ачалăхшăн, ачалăх ячĕпе" ыркăмăллăх марафонĕ уçăлнине пĕлтерчĕ. Ун хыççăн сцена çине район пуçлăхĕ М.Пуклаков хăпарчĕ, вăл та йывăр пурнăç условийĕсенче пурăнакан ачасене пулăшу пани çав тери пĕлтерĕшлĕ пулнине пĕлтерчĕ. Кашни ачан шăпи тĕрлĕрен килсе тухать, ашшĕ-амăшне суйламаççĕ вĕт. Ыттисем хушшинче хăйне аван мар туякан ачасене май килнĕ таран пулăшма май парать марафон. Хăй ятĕнчен вăл марафон пухмачне укçа хыврĕ.
Районти вĕрентÿпе çамрăксен политикипе спорт управленийĕн начальникĕ Ю.Соколов ыркăмăллăх, ырă туни çĕре ÿкменни çинчен, каялла çĕр хут ытларах ырăпа таврăнасса каларĕ. Кашни кун ырă ĕç тума васкамалла. "Йывăр пурнăç условийĕсенче çитĕнекен ачасене пулăшнисĕр пуçне пултаруллă ачасене çул уçса пыни те пĕлтерĕшлĕ. Районта пултаруллă ачасем нумай пуррине эпир вĕсен сцена çинчи ăсталăхне курса çирĕплететпĕр", - терĕ Юрий Васильевич. Марафонра районти вĕрентÿ учрежденийĕсенчи ачасен илемлĕ кăтартăвĕсем залра ларакансене тыткăнларĕç.
Çавăн пекех районти предприятисемпе организацисен, пур ял тăрăхĕсен пуçлăхĕсем хăйсен коллективĕсен ячĕпе ыркăмăллăх марафонне хутшăнчĕç. Çапла çак марафон малалла тăсăлать.
Источник: "Урмарская районная газета"
Первоисточник: Э.Михайлова.