04 марта 2017 г.
"Газпром" газораспределение Чебоксары" акционерлă обществăн Куславккари филиалĕн Вăрмарти газ участокĕ 1967 çулхи мартăн 5-мĕшĕнче йĕркеленнĕ. Кăçал унăн юбилейлă çул, шăп та лăп 50 çул çитет. Сахал мар вăхăт ку. Çур ĕмĕр хушшинче чылай пысăк курăмлă ĕçсем туса ирттернĕ. Тумалли татах та нумай. Паянхи кун асăннă организаци хăйĕн тивĕçĕсене мĕнле пурнăçласа пынипе паллаштарма эпир унăн пуçлăхĕнчен - Николай Георгиевич ВАСИЛЬЕВРАН ыйтрăмăр.
- Районта пурăнакансен кил-çуртĕнче, предприятисемпе организацисенче тата учрежденисенче епле хăтлă пуласси сирĕн коллектив пурнăçлакан ĕç пахалăхĕнчен нумай килет...
- Вăрмарти газ участокĕнче паянхи кун 43 çын вăй хурать. Пирĕн тĕп тĕллев вăл - халăха пĕр чарăнмасăр тата аварисĕр газпа тивĕçтересси. Çакна тĕпе хурса çынсен хуçалăхĕсенчи газ счетчикĕсене тата юрăхсăра тухнă котелсене улăштаратпăр тата нумай ĕçе пурнăçлатпăр. Паянхи кун 51 яллă вырăнта пуринче те газ пăрăхĕсене илсе пынă, пурăнакан çуртсене газ кĕртнĕ. Çак ĕçре нумай çул тăрăшакансене палăртас килет: А.Романов аслă мастер, Ю.Тимофеев ПТО инженерĕ, В.Михайлов слесарь, С.Никифоров СВДГО мастерĕ, В.Адюковпа А.Владимиров слесарьсем, Б.Филиппов водитель-слесарь тата ыттисем те пултарулăхĕпе палăраççĕ. Çапла, пирĕн участок районти 9488 уйрăм çуртсемпе хваттерсенчи, коммуналлă хуçалăхри, тĕрлĕ шайри предприятисенче, лавккасенче, шкулсенче вырнаçтарнă 150 ытла газ оборудование, кунпа пĕрлех 575 километр тăршшĕ газ пăрăхĕсене, газ валеçекен 89 пункта пăхса-тĕрĕслесе тăрать.
- Сирĕн ĕçре техники те, ĕç хатĕрĕсем те чылай кирлĕ. Ку енĕпе мĕн каланă пулăттăрччĕ-ши?
- Чăн та, пурлăхпа техника базине кирлĕ шайра тытса пынинчен пирĕн ĕç тухăçлăхĕ килет. Хуçалăхра паян пурĕ 7 çăмăл машина. Вĕсем пурте çĕнĕ. Чи кивви те 2012 çулхискер. Пĕр сăмахпа каласан, ку енĕпе пирĕн ыйту çук. Ку е вăл хуçалăх умĕнчен иртекен газ пăрăхĕсем çинче сăкăлтăк-мĕн сиксе тухас пулсан, йăлтах хамăр оборудованипе, ĕç инструменчĕсемпе килетпĕр.
- Вулакансене сирĕн организацин историйĕ те кăсăклантарать пулĕ. Çÿлерех те асăнса хăвартăмăр, ăна йĕркеленĕренпе çывăх кунсенче çур ĕмĕр çитет. Мĕнлерех пуçланнă-ши унăн çул-йĕрĕ?
- Организаци 1967 çулхи мартăн 5-мĕшĕнче йĕркеленнĕ терĕмĕр. Хăйĕн çур ĕмĕрĕнче унăн ячĕ темиçе хутчен те улшăннă пулнă. Хальхи вăхăтра пирĕн организаци "Газпром" газораспределение Чебоксары" АО Куславккари филиалĕн Вăрмарти газ участокĕ ятлă. Организацие çак тапхăр хушшинче кам кăна ертсе пыман пулĕ; Вĕсем: В.Казаков - пĕрремĕш руководитель, унтан П.Демьянов, И.Петров, В.Павлов, А.Васильев. Вĕсем хăй вăхăтĕнче организацие лайăх, çирĕп алăра тытса пынă. /Йывăр лавăн тилхепине халĕ 11 çул ытла Кĕтеснер ялĕнче çуралса ÿснĕ Николай Георгиевич Васильев ертсе пырать - автор /. Асăннă организацинче 2004 çулхи сентябрь уйăхĕнчен малтанласа диспетчертан ĕçлеме тытăнтăм.
Аварипе диспетчер служби ирĕн-каçăн ĕçлет. Халĕ çак ĕçе Ю.Макаров мастер ертсе пынипе Л.Егорова, И.Васильева, В.Иванов тата Е.Мелькова диспетчерсем пурнăçлаççĕ. Юратса ĕçлеттĕм хам ĕçе.
Çапла 2005 çулхи декабрьте "Урмарыгаз" филиал директорĕ пулса тăтăм. 2006 çултанпа "Газпром" газораспределение Чебоксары" АО Куславккари филиалĕн Вăрмарти газ участокĕн начальникĕ пулса ĕçлетĕп.
- Сăмах май, пуçлăхăн ĕç пÿлĕмĕнче Н.Васильева тата кунти коллектива ĕçри тăрăшулăхшăн тĕрлĕ çĕртен панă Хисеп грамотисемпе, Тав çырăвĕсемпе паллашма тÿр килчĕ. Ку вăл вĕсен ĕçне çулсеренех хаклакан стенд пулчĕ. Юбилей тĕлне çакă пысăк парне темелле.
Сирĕн коллектива 50 çулхи юбилейпе саламланă май малашнехи ĕçре ăнăçу кăна сунатăп.
- Тавах. Манăн хам енчен вара кунта вăй хунă, паянхи кун тивĕçлĕ канăва тухнă ветерансене тав сăмахĕ калас килет.
Источник: "Урмарская районная газета"
Первоисточник: И.АНТОНОВА калаcнa.