01 июня 2016 г.
Чăваш патшалăх филармонийĕнче Пĕтĕм тĕнчери IX кинофестиваль çĕнтерÿçисене хаваслă лару-тăрура чысланă.
Уява пухăннисене ЧР Пуçлăхĕ М.Игнатьев саламланă. Паян халăх кинопа кăсăкланнине, ирхине те кинона çынсем йышлăн çÿренине палăртнă республика Пуçлăхĕ. «Шупашкарта кинофестиваль ултă кун хушши халăха савăнтарчĕ. Хăнасене пирĕн тăрăха килме кăмăл тунăшăн тав тăватăп. Паян эпир, чăннипех те, тĕнчипе паллă, ют çĕршывсенче те ырăпа сарăлнă артистсем Чăваш Енре пулнишĕн мухтанма пултаратпăр. Кино пире культурăна, йăла-йĕркене тытса пыма пулăшать», - тенĕ М.Игнатьев. Вунă пин ытла çын кинофестивале хутшăнса хăйсен кăмăлне тултарнă, пурĕ 52 фильм курнă, вĕсенчен 8-шĕ Чăваш Енрисем. Киносене республикăра анчах мар, районсемпе хуласенче те халăх патне илсе çитернĕ. Çынсем Вăрмарта, Сосновкăра, Çĕмĕрлере, Куславккара тата ытти çĕрте те курнă. ЧР Пуçлăхĕн ятарлă парнине «Побег из Москвабада» фильм çĕнсе илнĕ. Раççей Президенчĕ кăçал Кино çулталăкĕ тесе палăртнă, ăна тĕпе хурса республикăра та тĕрлĕ мероприяти йĕркелесе ирттерме тĕллев лартнине пĕлтернĕ М.Игнатьев. Шупашкара кинофестивале пухăннисем ЧР Пуçлăхне çакăн пек пысăк витĕм кÿнĕшĕн, йĕркелÿçĕсене пысăк шайра мероприятисене хатĕрленĕшĕн, мĕнпур Чăваш Ен çыннисене пурне те ăшшăн кĕтсе илнĕшĕн чĕререн тухакан тав сăмахĕсем каланă. Мероприяти уяв концерчĕпе вĕçленнĕ.
Источник: "Урмарская районная газета"
Первоисточник: ЧР ПА пресс-служби.