28 мая 2016 г.
Çитес çур çуллăха хаçат-журнал çырăнтарассин тапхăрĕ вĕçлениччен тепĕр уйăх анчах юлчĕ ĕнтĕ.
Чун апачĕсĕр пурăнма хăнăхманскерсем, пурнăçпа пĕр тан утма вĕреннĕскерсем федераципе республика шайĕнчи хаçат-журналсене, районта тухса тăракан «Хĕрлĕ ялав» хыпарçине çырăнма тăрăшаççĕ. Халĕ тата вулаканăн укçи-тенкине перекетлемешкĕн хаçат-журналсене йÿнĕрех хакпа çырăнмалли тапхăрсем йĕркелеççĕ.
Çавăн пекех альтернативлă майпа та çырăнса илме май пур. Акă, районти тĕп больницăн поликлиникинче медсестрара чылай çул хушши вăй хуракан Елена Валерьяновна Эверскова район хыпарçине те яланах çырăнса илет. «Хĕрлĕ ялавсăр» епле пурăнăн-ха? Вăл пире районта мĕн пулса иртни-иртесси çинчен, районтан тухнă паллă çынсем тата ытти пирки те чăн малтан хыпарлать вĕт. Хаçата пуçламăш страницăран пуçласа вĕçне çитиех çемьепе тĕплĕн вуласа тухатпăр. Унсăрăн епле пултăр-ха? Çитес çур çулта та район хаçатне çемьепех туслăн вулăпăр», - пĕлтерет кăмăллăн Е.Эверскова.
Тăван районти кашни килтех район хыпарçи чăтăмсăррăн кĕтнĕ хаçат пултăрччĕ. Вулакансемшĕн ку е вăл информаци кăсăклăрах пултăр тесе çивĕч калем ăстисем те пĕтĕм пултарулăхне хурса тăрăшаççĕ.
Источник: "Урмарская районная газета"
Первоисточник: И.АНТОНОВА.