14 мая 2016 г.
Кĕтеснерти библиотекăра шкул ачисем, ветерансем йышлăн пуçтарăнчĕç. С.Скворцовăпа И.Германова культура ĕçченĕсем чăваш тумĕ тăхăнса чăваш чĕлхи кунне халалланă уява ертсе пычĕç. Уяв чăвашсен йăли-йĕркисемпе паллашнинчен пуçланчĕ. Акă, библиотекăн пĕр кĕтесĕнче ĕлĕкхи хресчен çуртне сăнарланă - стенасем çинче илемлĕ тĕрленчĕксем, тĕкĕрсем çинче тĕрленĕ алшăллисем. Кунтах ĕлĕкхи сĕтел çинче авалхи савăт-сапара чăвашсен наци апатне хатĕрленĕ.
Ачасем хăйсемех кил хуçисем те, хăнасем те пулчĕç, асаттесемпе асаннесем хăнасене мĕнле кĕтсе илнине, хăнасене сĕтел хушшине лартнине тата вĕсене ăсатса янине пуçласа курчĕç.
Уявра тĕрлĕрен викторинăсем те пулчĕç. Çавăн пекех кунта пухăннисем чăваш тĕррисемпе, арçынсен тата хĕрарăмсен тумтирĕсемпе электронлă презентаци урлă паллашрĕç. А.Иванов ветеран-пенсионер ачасене чăвашсен историйĕпе, чăваш чĕлхин илемлĕ янăравлăхĕпе кĕскен паллаштарчĕ, ачасен ыйтăвĕсем çине хуравларĕ.
Чăваш чĕлхи уявĕ пурте вăйă картине тăрса чăвашла ташланипе вĕçленчĕ.
Источник: "Урмарская районная газета"
Первоисточник: А.ЯКОВЛЕВ.