23 апреля 2016 г.
Раççей Федерацийĕн Атăлçи округĕнчи полномочиллĕ представителĕ пулăшнипе РФ Ют çĕршыв ĕçĕсен министерствин Чулхулари представительстви 2004 çултанпа «Манăн дипломат пулас килет» ятпа регионсем хушшинче конкурс йĕркелет.
XIII-мĕш хут иртекен конкурса Чăваш, Мордва, Удмурт Республикисенче, Чулхула тата Киров облаçĕсенче пурăнакан - иртнĕ çулсенче е кăçал шкул пĕтерекенсем, анчах та аслă пĕлÿ илмен çамрăксем - хутшăнма пултарĕç. Конкурсăн пĕрремĕш тапхăрĕ 2016 çулхи июнĕн 10-мĕшĕччен пырĕ. Хутшăнма кăмăл тăвакансен «Мĕншĕн манăн дипломат пулас килет» ятпа эссе çырас пулать. Калăпăшĕ А-4 хут формачĕн икĕ страницинчен пысăк пулмалла мар. Хатĕр ĕçсене www@mid.nnov.ru электронлă адреспа ярса памалла. Иккĕмĕш тапхăра вĕсем пĕрремĕш тапхăрти пĕтĕмлетÿсемпе халăхсем хушшинчи çивĕч ыйтусемпе тест витĕр июнĕн 21-24-мĕшĕсенче тухаççĕ, 20 балл пухас пулать. Пĕрремĕшпе иккĕмĕш тапхăр çĕнтерÿçисем июнĕн 28 - июлĕн 4-мĕшĕсенче виççĕмĕш тапхăра хутшăнаççĕ, ятарлă ыйтăм çак вăхăтра иртĕ.
Финалистсен пурин те вырăс чĕлхи, истори, ют чĕлхе предмечĕсемпе Пĕрлехи патшалăх экзаменне тытни çинчен калакан сертификат пулмалла. Июлĕн 4-мĕшĕнче конкурса пĕтĕмлетĕç. Тĕплĕнрех кун çинчен www.mid.nnov.ru Представительство сайтĕнчен пĕлме пулать.
Источник: "Урмарская районная газета"