22 марта 2016 г.
Районти тĕп библиотекăра çăварни эрнине халалласа «Сударыня масленица» ятпа мероприяти пулчĕ. Унта уявăн историйĕпе, унăн йăли-йĕркисемпе, çăварни эрнин кунĕсем çинчен уйрăммăн пĕлме, икерчĕсене пĕçерсе хатĕрлессин вăрттăнлăхĕсемпе паллашма пултарчĕç уява килнисем. Палăртас пулать, кунашкал мероприятисене районти халăха, çав шутра сусăр çынсене явăçтарас тĕллевпе те ирттереççĕ, вĕсен кулленхи пурнăçне кăсăклăрах, çутăрах, пурăнас хевтине ÿстерессишĕн тăрăшаççĕ кунта ырми-канми вăй хуракансем. Акă, Чăваш Республикинчи обществăлла организацийĕн «Пĕтĕм Раççейри инвалидсен обществи» районти организацийĕн председателĕ Э.Борисовăн та çак пархатарлă ĕçре тÿпи пысăк. Асăннă организацие нумай çул хушши ăнăçлă ертсе пырать вăл, обществăри сусăр çынсен хăтлăхĕшĕн, вĕсем хăйсен вăхăтне усăллă ирттерччĕр тесе чылай тăрăшать.
Çапла, сусăр çынсен кăмăл-туйăмне çĕклес, хавхалантарас тĕлĕшпе нумай ырă ĕç пурнăçлаççĕ вĕсем. Уява килнĕ хăнасене библиотека ĕçченĕсем пĕçернĕ тутлă икерчĕпе, вĕри чейпе сăйларĕç. Пурин пичĕсем çинче те ăшă кулă палăрчĕ.
Источник: "Урмарская районная газета"
Первоисточник: Р.ИВАНОВА