18 июля 2015 г.
Çуллахи каникул ачасемшĕн чи савăнăçлă самант пулнине пурте пĕлетпĕр ĕнтĕ. Вĕсемшĕн, чăн та, хаваслă самант пултăр тесен мĕн чухлĕ вăй хумалла, тивĕçлĕ тимлĕх уйăрас пулать.
Ача-пăча паянхи кун сывлăха çирĕплетмелли «Романтика» лагерьте канма кăмăл тăвать. Ытла та илемлĕ вырăнта вырнаçнă вăл. Пăхатăн та, йĕри-тавра сип-симĕс йывăçсем пĕр тикĕссĕн кашлаççĕ, килен-каяна сывлăх сунаççĕ тейĕн. Ачасем валли тунă пурăнмалли çурчĕсем хăйсен илемĕпе ретĕн-ретĕн куçа илĕртеççĕ. Кунта вара хăтлă та ăшă, çутă пÿлĕмсем. Кăçал пушшех те илемленчĕ вăл, мĕншĕн тесен кунта ачасене кĕтсе илме хатĕрленсе юсав ĕçĕсене тĕпрен пурнăçланă - корпуссен кантăкĕсене, ачасен пÿлĕмĕсене кĕмелли алăкĕсене, çивиттисене йăлтах улăштарнă, пĕтĕмпех çĕнĕ сĕтел-пукан, апат пĕçерсе хатĕрлемелли хальхи йышши оборудовани тата ытти тĕрлĕрен япаласем туяннă. Сывлăха çирĕплетмешкĕн, пур енлĕн канмашкăн условисем те çителĕклĕ. Акă, 2-мĕш сменăра 84 ача хăйĕн сывлăхне çирĕплетрĕ. Кунти вожатăйсем хăйсен активлăхĕпе палăрчĕç - ачасен канăвĕ интереслĕ те усăллă ирттĕр тесе ырми-канми ĕçлерĕç. Халичченхи пекех районти тĕп больницăн медицина ĕçченĕсем ачасен сывлăхĕпе тăтăшах интересленсе тăчĕç, çĕнĕ вĕренÿ çулĕнче çирĕп сывлăхлă пулччăр терĕç.
Ĕнер лагерьте 3-мĕш смена уçăлчĕ. Ку хутĕнче 75 ача хăйĕн сывлăхне çирĕплетĕ, кунти таса та уçă сывлăшра тĕрлĕ хускану, ăс-тăнпа çыхăннă вăййисене выляса киленĕ.
Источник: "Урмарская районная газета"
Первоисточник: И.АНТОНОВА.