06 февраля 2013 г.
Районти тĕп больницăн акт залĕнче медицина сестрисемпе «Чăваш Республикинчи медицина сестрисен ассоциацийĕн ĕçĕ-хĕлĕн аталанăвĕ» темăпа конференци иртнĕ. Унта районти тĕп больницăн, пĕтĕмĕшле практика врачĕн офисĕн, фельдшерпа акушер пункчĕсен медицина сестрисем хутшăннă.
Конференцире «Чăваш Республикинчи медицина сестрисен ассоциацийĕн ĕçĕ-хĕлĕн аталанăвĕ» обществăлла организацине ертсе пыраканĕ В.Викторова, «Вăрмар районĕнчи тĕп больница» бюджетлă учрежденин тĕп врачĕ В.Кириллов тухса калаçнă. В.Викторова палăртнă тăрăх, юлашки çулсенче чирлĕ пациентсен сыватас ĕçре медицина сестрисен ĕçĕ курăмлине, вĕсем хăйсен профессиллĕ ăсталăхне ÿстерсе пынине, çавна май чирлĕ çынсене пахалăхлă пулăшу парассипе тимленине палăртрĕ. Медицина сестрисен профессиллĕ ăсталăхне ÿстересси, ку енĕпе специалистсем ытларах хатĕрлесси, медицина сестрисен ĕçĕ-хĕлĕн нормативпа право базине йĕркелесси, инноваци технологисене ĕçе кĕртесси ассоциацийĕн тĕп тĕллевĕ пулса тăрать.
Ĕçре пысăк ÿсĕмсем тунăшăн Чăваш Республикин медицина ĕçченĕсен профессиллĕ ассоциацийĕн Хисеп грамотине районти тĕп больницăн аслă медицина сестри Л.Лебедева, анестезиологипе реанимаци уйрăмĕн аслă медицина сестри О.Ильина, поликлиникăн медицина сестри О.Иванова тата Л.Павлова акушерка тивĕçнĕ.