06 февраля 2013 г.
Шупашкарти Наци библиотекинче республикăри ял кооперативĕсен пĕрремĕш съезчĕ ĕçленĕ. Форума ЧР ял хуçалăх министрĕ С.Павлов ертсе пынă, ялсенчи кооператив хутшăнăвĕсен ку чухнехи лару-тăрăвĕпе тата аталану малашлăхĕпе тухса паллаштарнă.
- Пĕлтĕр республика туса илнĕ ял хуçалăх продукцийĕн пĕтĕмĕшле калăпăшĕ 2011 çулхин 104,1 проценчĕпе (Раççейре - 95,3) танлашнă. Тĕш тырă сахалрах пухса илнĕ пулсан та çĕр улмипе эпир федерацин Атăлçи округĕнче иккĕмĕш вырăн йышăнтăмăр - ăна 900 пин тонна пухса кĕртнĕ, виçĕм çулхинчен 9,5 процент ытларах, - тенĕ Сергей Владимирович. - Выльăх-чĕрлĕх ĕрчетессипе те лайăх ĕçлерĕмĕр. Уйрăмах çăмарта туса илессипе ăнтартăмăр - округра мала тухрăмăр. Çак çитĕнĕве ял хуçалăх кооперативĕсем курăмлă тÿпе хыврĕç.
Тытăмра Чăвашпотребсоюзăн пĕлтерĕшĕ пысăк. Кунта суту-илÿ, йăла ыйтăвĕсене тивĕçтересси, апат-çимĕç хатĕрлесси, ытти те кĕрет. Республикăри 100 çынран сахалрах пурăнакан 58 яла тавар çитерсе парать.
Чăвашпотребсоюз предприятийĕсем 23 процент çăкăрпа булка-батон, 19 процент кăлпасси, 62 процент тутлă шыв, 65 процент улма-çырлапа пахча çимĕç консервĕ туса кăлараççĕ, Раççейре экономика ăмăртăвĕнче 2-мĕш вырăн йышăнаççĕ.
Республикăри кашни виççĕмĕш çын потребкоопераци таварĕпе, пулăшăвĕпе усă курать, 8 пин ытларахăшне ĕçпе тивĕçтернĕ.
Ял çыннисене ытлашши çимĕçе вырнаçтарма 8 ял хуçалăх, 4 кооператив пасарĕ уçнă.
Мартăн 21-22-мĕшĕсенче Санкт-Петербургра Раççей ял кооперативĕсен I съезчĕ иртет, унта 1200 çын хутшăнĕ. Форумра пирĕн республикăран кайма 16 делегат суйларĕç.