06 июля 2013 г.
Иртнĕ уйăхра Пушкăрстанри Салават хулинче бокс енĕпе Атăлçи Федераллă округ чемпионачĕ иртнĕ. Вăрмартан унта «Алмаз сапаланчĕкĕсем» клубра ăсталăхне туптакан Игорь Николаев хутшăннă.
Хальччен те тĕрлĕ шайри турнирсене пĕрре кăна мар хутшăннă 64 килограмлă çамрăк спортсмен ринга хăйĕн ăсталăхĕпе вăйне шанса тухнă. Виçĕ спортсменпа тытăçнă чăваш каччи, виççĕшĕнче хăйне хирĕç тăракансене парăнтарнă. Пĕрремĕш тытăçу Самар облаçĕнчи Жигулевск хулинчи спорт мастерĕн кандидачĕпе пулнă. Иккĕмĕшĕнче рингра Ульяновск облаçĕнчи А.Антоновпа тĕл пулса ăна та çĕнтернĕ. Виççĕмĕшĕнче Пушкăртстан боксерĕпе тытăçса ăна 25 : 11 шутпа çĕнтерсе Атăлçи Федераллă округĕн Чемпионĕ пулса тăнă, Оренбургра июлĕн 3-9-мĕшĕсенче иртекен Раççей чемпионатне кайма путевка çĕнсе илнĕ. Çак йĕркесем пичетленĕ вăхăтра вăл чемпионатра ăмăртать. Ăнăçу сана, Игорь!
В.ТОЛМАТОВ.
Источник: "Урмарская районная газета"