08 июня 2013 г.
Майăн 30-мĕшĕнчен пуçласа июнĕн 3-мĕшĕчченех Мăнçырмари пĕтĕмĕшле пĕлÿ паракан вăтам шкул никĕсĕнче çамрăк армеецсен «Зарница», «Орленок» вăййисем иртрĕç. Çамрăк армеецсен вăййисенче 20 команда хутшăнчĕ.
Вăйăсем вĕçленнĕ май 300 ытла çамрăка район администрацийĕн пуçлăхĕ К.Никитин саламларĕ, çак кунсенче Вăйăсене хутшăнса хăйсене ÿт-пÿ тĕлĕшĕнчен кăна мар, ăс-хакăл енчен те çирĕплетнĕ ачасене малашне те пухнă вăй-хăвата упраса хăварма сунчĕ. Çавăн пекех çамрăк армеецсен вăййисене хутшăннисене район администрацийĕн пуçлăхĕн заместителĕ Ю.Соколов, ЧР Çар ĕç комиссариачĕн Вăрмар тата Куславкка районĕсенчи пай пуçлăхĕ В.Ляшенко саламларĕç. 5 куна пынă мероприятире шкул ачисем хăйсен çаврăнăçулăхĕпе вăйне кăна мар, конкурссенче теори, практика тĕлĕшĕнчи пĕлĕвĕсене те кăтартрĕç. Кашни команда чăрмавсем витĕр тивĕçлĕ тухрĕç. Вăйăсене пĕтĕмлетнĕ май зарничниксем хушшинче Шăхалĕнчи пĕтĕмĕшле пĕлÿ паракан тĕп шкул команди 1-мĕш, Вăрмарти Г.Е.Егоров ячĕллĕ вăтам шкул команди - 2-мĕш, Чулкасри пĕтĕмĕшле пĕлÿ паракан тĕп шкул команди 3-мĕш вырăнсене çĕнсе илчĕ. «Орленок» ушкăнри командăсем хушшинче Вăрмарти Г.Е.Егоров ячĕллĕ вăтам шкул команди 1-мĕш, Энĕшпуçĕнчи вăтам шкул команди 2-мĕш, Мăнçырмари вăтам шкул команди 3-мĕш вырăнсене тивĕçрĕ.
Н.ПЕТРОВА.
Источник: "Урмарская районная газета"