22 мая 2013 г.
Энĕшпуçĕнчи «Иванова О.А.» хресчен (фермер) хуçалăхĕнче тăрăшакансемшĕн çур акин хĕрÿ тапхăрĕ вĕçленчĕ теме те юрать. Районта пĕрремĕшсем хушшинче хуçалăхăн ĕçченĕсем кĕрхисене апатлантарса, çурхисене акса, çĕр улмине лартса та пĕтерчĕç. Хуçалăхăн çĕре те сахалах мар - 556 гектар.
- Лайăх çанталăкпа туллин усă курма тăрăшрăмăр. Тĕш тырăпа ытти культурăсене кăçал 357 гектар çинче имçамланă, элитлă вăрлăх акса хăвартăмăр. Кĕрхисене 80 гектар çинче вăхăтра апатлантартăмăр. Ĕççи пĕр кăлтăксăр, чăрмавсăр иртрĕ. Çунтармалли-сĕрмелли материалсемпе минераллă удобренисене ытлăн-çитлĕн кÿрсе хунă. Хуçалăх ĕçченĕсене пĕтĕм кăмăлтан палăртса хăварас килет. Уйрăмах Н.Семенов, А.Алексеев, В.Тихонов механизаторсем тăрăшса ĕçлерĕç. В.Беловпа И.Иванов водительсем вăрлăхпа вăхăтра тивĕçтерсе тăчĕç. С.Петровпа Г.Кузнецов сеяльщиксем ĕç пахалăхĕ çине уйрăмах тимлĕ пăхрĕç, - тесе пĕлтерчĕ И.Иванов, вăлах хуçалăха ертсе пыракансенчен пĕри (ÿкерчĕк çинче çур акине хутшăнакансен пĕр ушкăнĕ). Каласа хăвармалла, «Иванова О.А.» хресчен (фермер) хуçалăхĕ тĕш тырăсăр пуçне çĕр улми çитĕнтерессипе те ĕçлет. «Иккĕмĕш çăкăрăн» тĕрлĕ сорчĕсене çитĕнтереççĕ вĕсем, кăçал та пысăк тухăç паракан «Импала», «Каратоп» çĕнĕ йышши сортсене лартнă. Çак культурăна 75 гектар çинче лартса хăварнă.
П.АЛЕКСЕЕВ.
Источник: "Урмарская районная газета"