08 мая 2013 г.
А. ИВАНОВ
Вăрçă тухассине пурте пĕлетчĕç,
Анчах кĕтместчĕç çав июнь кунне.
Тĕлĕнмелле хавас пурнăç кĕрлетчĕ,
Тавралăхра çиçетчĕ çуркунне.
Çитет июнь - хаяр, хăрушă вăрçă.
Ялта кашни кунах салтак юрри.
Вăрçа мĕн пур арçынсене ăсатнă,
Юлашки хут ĕçтернĕ çул курки.
Ака-суха тума арçын юлмарĕ -
Хĕрарăмсем те ачасем кăна,
Вĕсем вăхчи çитсен тыррине акрĕç,
Пуçтарчĕç кĕркунне вăйран кайса.
Хĕвелпеле ĕçе тухса каятчĕç,
Хĕвел ансан кĕретчĕç уй-хиртен.
Нумай чухне апачĕ те çитместчĕ,
Ларса канма та çукчĕ вăй пĕтсен.
Фронтран салхуллă çырусем килетчĕç,
Кашнин салтакĕ çырнă ак çапла:
«Паян чĕрех-ха, ал-ура сывах-ха,
Ыран темле, ыран - атакăна.
Сиртен уйăрăлни çур çул та иртрĕ,
Уйăх çитет - ăшă пÿрте кĕмен.
Ялан сирĕн çинчен эп шухăшлатăп,
Сире аса илмесĕр кун иртмен.
Ман ачамсем те, Зоя, Миша, Роза!
Сире канаш паратăп юратса:
Вĕренĕр яланах çине тăрса,
Пулăшăр, итлĕр хăвăр амуна.
Ак çĕнтерсе часах çаврăнса çитĕп,
Эсир унччен чуптарăр вăрмана.
Мана валли пĕр чашăк татса килĕр
Эп килĕштернĕ хĕрлĕ çырлана.
Эсĕ, юратнă мăшăрăм, ан макăр,
Чипер пăхса ÿстер ачасене.
Çак йывăр самана тертне пăхмасăр
Эс вĕсене тăрат ура çине».
Куççульпеле çырусене вулатчĕç,
Макра-макра çыратчĕç хуравне.
Кайран хăрушă хыпарсем илетчĕç,
Анатчĕç вырăнтах тĕшĕрĕлсе.
Манма май çук: хĕрарăмсем ĕçреччĕ -
Куççулĕпе хăпарнă куçĕсем.
Паян пĕри йĕрет - упăшки вилнĕ,
Ыран тепри - çухалнă ачисем.
Мĕн тăвăн - темĕн чухлĕ шурă çĕмĕрт
Çуркуннепе çурмарĕ пуль çеçке.
Мĕн тăвăн ĕнтĕ - мĕн чухлĕ çырлийĕ
Çаплах çимесĕр юлчĕ пулĕ-çке.
Тăватă çул ытла тертленнĕ хыççăн
Тăвăл иртсен Хĕвел пăхнă пекех
«Победа! Çĕнтерÿ!» - янрарĕ уççăн,
Иртнĕ асапĕ килес çук текех!
«Вăрçă чарăннă» тенине илтсессĕн
Ял халăхне пуçтарчĕç клубалла.
Çав ырă хыпара тĕплĕн пĕлесшĕн
Манăн анне те утрĕ пухуна.
Источник: "Урмарская районная газета"