20 апреля 2013 г.
Çулсем иртнĕ майăн сывлăхĕ те хавшать, вăй-халĕ те чакать. Кил-тĕрĕшри ĕçсене пурне те вăхăтра туса та пĕтересси пулмасть.
Кун пек чухне пирĕн пек вăй-хал чакнă çынсене пулăшма Мăнçырмари вăтам шкул ачисем яланах хатĕр.
Шыв-шур пуçланнă вăхăтра кил таврашĕнче ĕç уйрăмах нумай: шыв çулĕ те уçмалла, юрне те хырмалла.
Кăçал та акă шкул ачисен пĕр ушкăнĕ мана пулăшма килсе çитрĕ. Юр куписене салатма, пÿрт çумĕсене юртан тасатма пулăшрĕç вĕсем.
Çамрăксен вăйĕ вĕресе тăрать те, курса ĕлкĕрнĕ çĕре ĕçе вĕçлерĕç те вĕсем.
Ку ĕçре уйрăмах палăрнă М.Владимирова, Н.Петрова, М.Иванова, Е.Аверьяновăна, К.Васильевăна, ачасен ĕçне йĕркелесе ертсе пыракан вĕрентекенсене чĕререн тав тăватăп. Хĕл килет те хĕл каять, анчах та çамрăксем ватă çынсене пулăшни питĕ пĕлтерĕшлĕ.
Н. ФИЛИППОВА