Публикации » Нуски вĕççĕн каçмалла пулмĕ

28 ноября 2012 г.

Самолетсемпе тăван çĕршывĕн тĕрлĕ кĕтесĕсене, ют çĕршывсене вĕçекенсен йышĕ çулсерен ÿсет. Çав шутра пирĕн районта пурăнакансем те транспортăн çак тĕсĕпе ытларах та ытларах усă кураççĕ. Чăн та - хăвăрт, меллĕ. Анчах кашни япаланах тÿнтер енĕ те пур - аэропортра тĕрĕслев витĕр тухнă чухне пушмаксемпе туфлисене хывмалла. Ку вăл илсе çÿреме юраман япаласене (çав шутра сирпĕтмелли хатĕрсене те) тупса палăртассипе çыхăннă. «Российская газета» пĕлтернĕ тăрăх, тепĕр çултан тĕрĕслев пункчĕ витĕр нуски вĕççĕн тухмалла пулмĕ. Часах Раççейри пысăк аэропортсене радиопластинăсем вырнаçтарнă приборсемпе тивĕçтерĕç. Çапла вара 15 çеккунт хушшинчех инспектор пушмак тĕпĕ ăшне пытарнă укçана та, сирпĕтмелли хатĕре те тупма пултарĕ.