24 ноября 2012 г.
Ноябрĕн 20-мĕшĕ - Пĕтĕм тĕнчери Ачасен кунĕ.
Çак кун эпир, Мăнçырмари информаципе культура центрĕн ĕçченĕсем, шкул çумĕнчи «Пукане» ача садне çул тытрăмăр. Кунта ĕçлекенсемпе ачасем пире кăмăллăн кĕтсе илчĕç. Уява «Ачасен кунĕ» сăвăпа А.Васильева воспитатель уçрĕ. Ертсе пыраканĕсем Л.Романовăпа Н.Ильина тĕрлĕ конкурссем, вăйăсем, викторинăсем ирттерчĕç. О.Васильева музыка ертÿçи ачасене тĕрлĕ юрăсем юрлаттарчĕ.
Уйрăмах ачасене «Чĕр чунсен хорĕ», «Кам хăвăртрах» вăйăсем килĕшрĕç. Викторинăра ачасем хăйсен пĕлĕвĕсене кăтартрĕç. Кунта А.Васильевăпа Т.Александрова воспитательсен тÿпи пысăк. Ачасене уяв ячĕпе парнесем парса хавхалантарчĕç. Уяв «Пĕчĕк хуракăшсен» ташшипе вĕçленчĕ. Кăмăла çĕклеме нумай та кирлĕ мар, çак мероприяти ăна çирĕплетсе пачĕ.