21 ноября 2012 г.
Ноябрĕн 19-мĕшĕнче Мускавра Чăваш Ен Пуçлăхĕ М.Игнатьев Раççейĕн регионсен аталанăвĕн министрĕпе И.Слюняевпа курнăçнă. Тĕл пулура республика территорийĕнче федераци программисене пурнăçлассипе, пурăнмалли çурт-йĕр строительствине пулăшассипе, çавăн пекех Шупашкар хулине никĕсленĕренпе - 550, Чăваш автономи облаçне туса хунăранпа 100 çул çитнине уявлассипе çыхăннă ыйтусене сÿтсе явнă.
М.Игнатьев федераци министрне пĕлтернĕ тăрăх - Чăваш Енре экономкласс шутланакан çурт-йĕр строительствине вăй памалли норма акчĕсене хатĕрленĕ. Республикăн патшалăх тата муниципалитетсен харпăрлăхĕнчи çĕр резервне йĕркелеççĕ. Çак лаптăксене инженери инфратытăмĕпе тивĕçтерме палăртнă, вĕсене пĕчĕк бюджетлă çурт-йĕре комплекслă майпа тăвакансене парасшăн. Çак мерăсем çурт-йĕрĕн тăваткал метрĕн хакне палăрмаллах чакарма май парĕç. Федерацин строительство тата пурăнмалли çурт-йĕрпе коммуналлă хуçалăх агентствине «пилот» шайĕнче республика территорийĕнче пурнăçлама палăртакан, экономкласс йышши çурт-йĕр тумалли виçĕ проектпа заявкăсем ярса панă та ĕнтĕ. Çак проектсене пурнăçа кĕртни экономкласс йышши 101,5 пин тăваткал метр çурт-йĕр хута яма, 1850 ытла çемьен пурăнмалли условийĕсене лайăхлатма май парĕ.