Публикации » Яка çул такăнтармасть

21 июля 2012 г.

Çак кунсенче поселок центрĕн тĕп урамĕ ĕç шавĕпе тулчĕ. Вăрмар хула администрацийĕ «Мордовснабресурс» тулли мар яваплă обществăпа поселокри хăш-пĕр урамри çулсене юсама килĕшÿ тунă иккен. Шăпах Ленин урамĕнчи çул çинчи шăтăк-путăксене ирĕлтернĕ битум ярса саплаççĕ çамрăк каччăсем. Тĕп урамсăр пуçне поселокри Молодежная, Заводская урамсенчи çулсене те юсав кĕтет, Порфирьев тата Чувашская урамри çулсене вара вак чул сарма палăртнă. Пур ĕçе те «Мордовснабресурс» общество ĕçченĕсем пурнăçлаççĕ.

Çавăн пекех Вăрмар хула тăрăхĕн администрацийĕ халĕ поселокри пурăнмалли çуртсем умĕнчи территорисенче юсав ĕçĕсем ирттермелли конкурса хутшăнма документсем хатĕрлессипе ĕçлет.