04 июля 2012 г.
Çак кунсенче Канаш районĕнче Асхвапа Шăхасан ялĕсем хушшинче çамрăк армеецсен республикăри «Зарница» тата «Орленок» вăййисен финалĕ 44-мĕш хут иртнĕ.
Унта республикăри районсемпе хуласенчен 69 команда, пин ытла çамрăк хутшăннă. Виçĕ куна тăсăлнă вăййа хутшăнакансене ЧР Пуçлăхĕ М.Игнатьев саламлама килнĕ. Михаил Васильевич ачасем мĕнле вырнаçнипе кăсăкланнă, пурне те çитĕнÿсем патне ăнтăлма суннă. Унтан уяв парадне хутшăннă.
Пирĕн районтан та çак вăйăсене «Зарница» ушкăнĕнче пурнăç хăрушсăрлăхĕн никĕсне вĕрентекен В.Иванов ертсе пыракан Пысăк Енккассинчи кадетсем, «Орленок» ушкăнра Г.Е.Егоров ячĕллĕ вăтам шкулти вĕренекенсем - ертÿçи В.Антонов (вăл та пурнăç хăрушсăрлăхĕн никĕсĕсене вĕрентет) хутшăннă. Çак вăйăсенче Пысăк Енккасси шкулĕн кадечĕсен команди 7-мĕш вырăн йышăннă.